। लोकजागर । फलटण । दि. 26 नोव्हेंबर 2025 ।
साखरवाडी शिक्षण संस्थेच्या साखरवाडी विद्यालय प्राथमिक विभागात सुमारे 35 वर्षे अखंड सेवा केलेल्या माजी मुख्याध्यापिका कै. श्रीमती निर्मला भार्गव वाळिंबे यांच्या दहाव्या स्मृतिदिनी वाळिंबे परिवाराकडून विद्यालयाच्या प्राथमिक विभागासाठी महत्त्वपूर्ण देणगी देण्यात आली.
कै. वाळिंबे यांच्या स्मरणार्थ त्यांच्या परिवाराने प्राथमिक विभागाला एकूण एक लाख रुपये किंमतीची आठ मजबूत कपाटे प्रदान केली. साखरवाडी शिक्षण संस्थेचे संचालक राजेंद्र शेवाळे आणि माणिक आप्पा भोसले यांनी या फर्निचरचा स्वीकार केला. याप्रसंगी संस्थेच्या बालक मंदिर आणि प्राथमिक विभागातील सर्व विद्यार्थी-विद्यार्थिनींना खाऊ वाटप करण्यात आले.
या कार्यक्रमाला वाळिंबे परिवारातील संजय वाळिंबे, श्रद्धाताई वाळिंबे, नंदकुमार वाळिंबे, शुभदा वाळिंबे, श्रीमती मनोरमा वाळिंबे हे उपस्थित होते. तसेच, साखरवाडी शिक्षण संस्थेच्या सचिव व माध्यमिक विद्यालयाच्या मुख्याध्यापिका उर्मिलाताई जगदाळे, माजी विद्यार्थी संघाचे कार्यवाह हरिदास सावंत, प्राथमिक विभागाचे मुख्याध्यापक संदीप चांगण, सर्व शिक्षिका भगिनी व विद्यार्थी उपस्थित होते.
कार्यक्रमाच्या सुरुवातीला हरिदास सावंत यांनी कै. वाळिंबे बाईंच्या आठवणींना उजाळा देऊन त्यांना विनम्र अभिवादन केले. त्यांच्या सूनबाई आणि पुण्याच्या राणी लक्ष्मीबाई मुलींचे मिलिटरी स्कूलच्या माजी मुख्याध्यापिका श्रद्धाताई वाळिंबे आणि त्यांचे मोठे चिरंजीव संजय वाळिंबे यांनीही मनोगत व्यक्त केले.
याच कार्यक्रमात संस्थेच्या माध्यमिक विद्यालयातील विद्यार्थिनी कुमारी दिशा राहुल बोंद्रे हिची राष्ट्रीय खो-खो स्पर्धेसाठी निवड झाल्याबद्दल तिचा आणि तिचे मार्गदर्शक रोहिदास गावित यांचा संस्थेच्या वतीने सन्मान करण्यात आला.
आभार प्रदर्शन संदीप चांगण यांनी केले. कार्यक्रमाचे यशस्वी नियोजन केल्याबद्दल वाळिंबे परिवाराकडून माजी विद्यार्थी संघाचे कार्यवाह हरिदास सावंत यांचे विशेष आभार मानण्यात आले.
