फलटण-कोरेगाव मतदारसंघासाठी तब्बल ९३ कोटी !

रणजितसिंह नाईक निंबाळकर व आमदार सचिन पाटील यांच्या पाठपुराव्याला यश

। लोकजागर । फलटण । दि. ११ मार्च २०२६ ।

राज्याच्या नुकत्याच झालेल्या अर्थसंकल्पात फलटण-कोरेगाव विधानसभा मतदारसंघासाठी विकासाची मोठी लॉटरी लागली आहे. माजी खासदार रणजितसिंह नाईक निंबाळकर आणि आमदार सचिन पाटील यांच्या आक्रमक आणि सातत्यपूर्ण पाठपुराव्याला अखेर मोठे यश आले असून, मतदारसंघातील विविध कामांसाठी तब्बल ९३ कोटी ३५ लाख रुपयांच्या भरीव निधीची तरतूद करण्यात आली आहे. या ऐतिहासिक निधीमुळे मतदारसंघातील रस्ते आणि पुलांच्या कामांचा मोठा प्रश्न कायमचा मार्गी लागणार असून, याबद्दल मुख्यमंत्री देवेंद्र फडणवीस, उपमुख्यमंत्री सुनेत्राताई पवार, सार्वजनिक बांधकाम मंत्री शिवेंद्रसिंहराजे भोसले आणि ग्रामविकास मंत्री जयकुमार गोरे यांचे विशेष आभार मानण्यात आले आहेत. या भरघोस निधीबद्दल माजी खासदार रणजितसिंह नाईक निंबाळकर व आमदार सचिन पाटील यांनी मुख्यमंत्री देवेंद्र फडणवीस, उपमुख्यमंत्री सुनेत्राताई पवार, सार्वजनिक बांधकाम मंत्री श्रीमंत छत्रपती शिवेंद्रसिंहराजे भोसले व ग्रामविकास मंत्री जयकुमार गोरे यांचे मनःपूर्वक आभार मानले आहेत. फलटण-कोरेगाव मतदारसंघाला मुख्यमंत्र्यांनी कायम झुकते माप दिले असल्याची भावना रणजितसिंह नाईक निंबाळकर यांनी व्यक्त केली असून, मंजूर झालेली सर्व विकासकामे लवकरात लवकर सुरू करण्यासाठी आपण कटिबद्ध असल्याचे त्यांनी स्पष्ट केले.

रणजितसिंह नाईक निंबाळकर यांनी फलटणच्या सर्वांगीण विकासाचा जो ध्यास घेतला आहे, त्यातूनच यापूर्वी प्रशासकीय इमारत, महसूल भवन, पालखी महामार्ग, तारांगण आणि अद्ययावत स्टेडियम यांसारख्या शेकडो कोटींच्या कामांना त्यांनी गती दिली होती. आता या नव्या ९३ कोटींच्या निधीतून मतदारसंघाचा कायापालट होणार आहे. यामध्ये प्रामुख्याने सासवड भाडळे ते सांगवी रस्ता सुधारणा, गिरवी-मांडवखडक-वाखरी मार्गावरील कॅनाल डक्टखाली आरसीसी गटर आणि रस्त्याचे बांधकाम, रेल्वे क्रॉसिंग ते रा.मा. ९६५ ड भागात रुंदीकरण, आणि जिंती-साखरवाडी-नांदल-बोडकेवाडी-गिरवी रस्त्याच्या विविध टप्प्यांवरील कामांचा समावेश आहे. तसेच कांबळेश्वर रोड ते सोमंथळी, आरडगाव ते हिंगणगाव गावातील सीसी रस्ते आणि काँक्रीट गटर, जानुबाई मंदिराजवळ राजाळे येथे संरक्षक भिंतीसह सुधारणा, राऊतवाडी ते पिंपोडे रस्ता सुधारणा, वाई-साळशी-पिंपोडे रस्ता आणि पोलादपूर-वाई-दहिवडी रस्त्यावरील पिंपोडे ते चिखले या भागातील कामांना गती मिळणार आहे.

या निधीचा ओघ इतका मोठा आहे की, मतदारसंघातील अनेक प्रलंबित रस्ते आता काँक्रीटचे होणार आहेत. यात राजुरी ते कुरवली बु. रस्ता रुंदीकरण, फलटण-शिंगणापूर ते विडणी रस्ता सुधारणा, गिरवी ते दुधेबावी रस्ता, आणि सीतामाई घाट पायथा ते तालुका हद्द भागात संरक्षक भिंतीसह होणारी सुधारणा अत्यंत महत्त्वाची आहे. यासोबतच सांगवी ते सांगवी बंगला रस्ता, फळतरवाडी ते प्राजमा १० रस्ता सुधारणा, नांदल-सुरवडी-होळ रस्त्याचे काँक्रीटीकरण, सोळशी-करंजखोप-वाठार स्टेशन रस्ता आणि देहिगाव ते रा.मा. १३९ या रस्त्यांचे भाग्य उजळणार आहे. ग्रामीण भागातील वाड्या-वस्त्या जोडण्यासाठी नायगाव ते करंजे, घिगेवाडी, चौधरवाडी, फळतरवाडी जोडरस्ता, आंदरूड-बरड-गुणवरे रस्ता आणि सासवड पाटीलवस्ती ते दुधेबावी यांसारख्या अनेक अंतर्गत रस्त्यांच्या कामांना प्रशासकीय मान्यता मिळाली आहे.

या विकासगांगेत फलटण पुसेगाव ते तरटवस्ती, विमानतळ ते ठाकूरकी, ठाकूरकी ते शेलारवस्ती बाणगंगा फाटा, पद्मावती मंदिर परिसर, वाखरी-ढवळपाटी ते तरडफ, ढवळ ते मानेवाडी आणि निरगुडी ते सासवड या रस्त्यांचाही समावेश आहे. तसेच ताथवडा ते झडकवाईचीवाडी, जाधववाडी ते गिरवी, कुरवली खुर्द ते रा.मा. १४७, जाधववाडी पंचवीगा ते गोखळी, ढवळवाडी ते रामओढा, निंबळक बड्ल ते इरिगेशन बंगला, मठाचीवाडी ते चव्हाणवस्ती, खटकवस्ती ते डाँवाळे वस्ती, साठे ते तावरे वस्ती, पाडेगाव ते फार्म, आणि विठ्ठलवाडी ते प्रजिमा ८६ या सर्व रस्त्यांचे प्रश्न मार्गी लागणार आहेत. तावडी हरिजनवस्ती, तरडगाव ते विठ्ठलवाडी काँक्रीटीकरण, हणमंतवाडी ते अलगुडेवाडी फार्म, सरडे-सोनगाव, टाकळेवाडा-फुलेवस्ती, पिंप्रद-सोनवडी, कांबळेश्वर रस्ता, विडणी ते भिवरकर वस्ती आणि खुंटे ते हनुमान नगर या भागातील प्रजेची रस्तेकोंडी आता फुटणार आहे.

निधीचा हा विस्तार पुढे जाऊन साखरवाडी ते ७ सर्कल, सुरवडी ते ९ सर्कल, भुरकवडी ते हिंगणगाव, रामुसेवाडी, कुंजळेवस्ती ते धनगरवाडा आणि पुणे रस्ता ते काशीदवाडी या कामांपर्यंत पोहोचला आहे. विचुर्णी ते निरगुडी, गुणवरे ते मांगोबामाळ, राजाळे हरिजनवस्ती, वरड ते वागेवाडी काँक्रीटीकरण, निंबळक ते बाबा ढाबा, नांदल ते मुळीकवाडी, सासवड ते माळीबंद काँक्रीटीकरण, बदाचामळा, आदर्की बु. येथील खराडेवस्ती, कापडगाव-चव्हाणवाडी आणि महाड पंढरपूर रस्ता ते बनकरवस्ती यांसारख्या कामांनी मतदारसंघाचा प्रत्येक कोपरा विकासाशी जोडला जाणार आहे. याशिवाय झडकवाईचीवाडी ते बेलोशी रस्ता सुधारणा आणि निरगुडी व मठाचीवाडी येथील ओढ्यांवरील पुलांचे बांधकाम ही ९३ कोटींच्या निधीतील मैलाचा दगड ठरणारी कामे आहेत. या सर्व कामांमुळे दळणवळण सुलभ होऊन मतदारसंघातील व्यापार आणि शेतीला नवी दिशा मिळेल, असा विश्वास रणजितसिंह नाईक निंबाळकर यांनी व्यक्त केला आहे.