कचरा उघड्यावर टाकण्याच्या प्रवृत्तीमुळे एका निष्पाप गाईला जीवघेण्या वेदना सोसाव्या लागत असून, सुखकर्ता एनजीओने तातडीने धाव घेत गाईवर उपचार करून तिला जीवदान दिले आहे.
| लोकजागर | फलटण | १० एप्रिल २०२६ |
फलटण तालुक्यातील जाधववाडी येथे मानवी निष्काळजीपणाचा एक अत्यंत धक्कादायक आणि हृदयद्रावक प्रकार समोर आला आहे. एका गाईच्या तोंडातून मोठ्या प्रमाणात रक्तस्त्राव होत असल्याची माहिती स्थानिक नागरिकांनी सुखकर्ता एनजीओला दिली. माहिती मिळताच संस्थेचे प्रमुख आणि प्राणीमित्र श्याम पवार यांनी डॉक्टरांच्या टीमसह घटनास्थळी धाव घेतली. गाईची अवस्था अत्यंत गंभीर होती, तिच्या तोंडातून रक्ताच्या धारा वाहत होत्या. डॉक्टरांनी तातडीने उपचार सुरू केले असून ही गाय आता मृत्यूच्या दाढेतून बाहेर येईल, अशी आशा व्यक्त केली जात आहे.
संस्थेच्या डॉक्टरांनी जेव्हा गाईच्या जखमेची बारकाईने तपासणी केली, तेव्हा धक्कादायक वास्तव समोर आले. अनेकदा घरामध्ये काचेच्या वस्तू तुटल्यानंतर लोक त्या कणकेच्या गोळ्याने किंवा अन्नाच्या अवशेषाने साफ करतात आणि तो कचरा उघड्यावर फेकून देतात. हाच काचेचे तुकडे असलेला गोळा अन्नाच्या आमिषाने या गाईने खाल्ला आणि त्यामुळे तिचे तोंड पूर्णपणे कापले जाऊन गंभीर जखम झाली. केवळ तोंडच नव्हे, तर तपासणीदरम्यान गाईच्या पोटात लोखंडी खिळे आणि इतर टोकदार वस्तू असल्याचेही निष्पन्न झाले आहे.
उघड्यावर टाकण्यात आलेल्या कचऱ्यातून या घातक वस्तू गाईच्या पोटात गेल्या असून, त्यामुळे तिचे अंतर्गत अवयव देखील रक्तबंबाळ झाले आहेत. लोकांच्या एका छोट्याशा चुकीमुळे एका मुक्या प्राण्याला असह्य यातना सहन कराव्या लागत आहेत. गाईच्या पोटात सापडलेले लोखंडी खिळे आणि टोकदार वस्तू हे मानवी वस्त्यांमधून बाहेर फेकल्या जाणाऱ्या कचऱ्याचाच भाग असल्याचे स्पष्ट झाले आहे. या घटनेमुळे परिसरात हळहळ व्यक्त होत असून, कचरा व्यवस्थापनाबाबत नागरिकांमध्ये जनजागृती करण्याची गरज अधोरेखित झाली आहे.
प्राणीमित्र श्याम पवार यांनी या घटनेच्या निमित्ताने नागरिकांना कळकळीचे आवाहन केले आहे. तुटलेल्या काचेचे तुकडे, जुने खिळे, लोखंडी वस्तू किंवा उंदीर-मुंग्या मारण्याचे औषध चुकूनही उघड्यावर टाकू नका. आपला हा निष्काळजीपणा एखाद्या मुक्या जिवाचा जीव घेऊ शकतो. आपण सर्वांनी जबाबदारीने कचऱ्याची विल्हेवाट लावल्यास असे अपघात टाळता येतील, असे त्यांनी नमूद केले.
‘सुखकर्ता एनजीओ’ने वेळेत दखल घेतल्यामुळे गाईवर उपचार शक्य झाले असले, तरी भविष्यात अशा घटना घडू नयेत यासाठी सामाजिक भान जपण्याचे आवाहन करण्यात येत आहे. स्वच्छता आणि जबाबदारीची सवय लावून आपण या मुक्या प्राण्यांचे प्राण वाचवू शकतो. फलटणमधील या घटनेने पुन्हा एकदा मानवी संवेदनशीलतेवर प्रश्नचिन्ह उपस्थित केले आहे.
