राजे गटाचा आज शिवसेनेत जाहीर प्रवेश; एकनाथ शिंदेंच्या सभेकडे तालुक्याचे लक्ष

। लोकजागर । फलटण । रोहित वाकडे । दि. २८ नोव्हेंबर २०२५ ।

फलटण नगरपरिषद निवडणुकीच्या तोंडावर आज, शुक्रवार दि. २८ नोव्हेंबर रोजी येथील राजकारणाला निर्णायक कलाटणी देणारी मोठी घटना घडत आहे. तालुक्यात सुमारे ३० वर्षांची सलग सत्ता असलेल्या राजे गटाने निवडणुकीच्या अगदी मोक्याच्या क्षणी शिवसेनेचा (शिंदे गट) ‘धनुष्यबाण’ अधिकृतपणे हाती घेतला आहे. यामुळे राजे गट आणि शिवसेनेच्या कार्यकर्त्यांमध्ये एक नवीन ऊर्जा आणि उमेद निर्माण झाली आहे.

राजे गटाच्या दिग्गजांचा शिवसेनेत प्रवेश

आज दुपारी ३ वाजता शहरातील गजानन चौक येथे होणाऱ्या जाहीर सभेमध्ये शिवसेनाप्रमुख तथा राज्याचे उपमुख्यमंत्री ना. एकनाथ शिंदे यांच्या हस्ते राजे गटाच्या प्रमुख नेत्यांचा शिवसेनेत जाहीर प्रवेश होत आहे. यात सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर, कृषी उत्पन्न बाजार समितीचे चेअरमन श्रीमंत रघुनाथराजे नाईक निंबाळकर, माजी आमदार दीपक चव्हाण तसेच नगराध्यक्षपदाचे उमेदवार श्रीमंत अनिकेतराजे नाईक निंबाळकर यांच्यासह राजे गटाचे आजी-माजी पदाधिकारी आणि हजारो कार्यकर्ते हातात धनुष्यबाण घेणार आहेत.

शिंदे कोणता ‘बूस्टर डोस’ देणार?

गेल्या विधानसभा निवडणुकीत पराभव पत्करावा लागल्यानंतर राजे गट स्थानिक स्वराज्य संस्थांच्या निवडणुकीपूर्वी कोणता राजकीय निर्णय घेणार, याकडे सर्वांचे लक्ष लागले होते. अखेर, नगरपरिषद निवडणुकीच्या मोक्यावर शिवसेनेच्या अधिकृत चिन्हावर राजे गटाचे उमेदवार उभे राहिले आणि कार्यकर्त्यांमध्ये सकारात्मक ऊर्जा निर्माण झाली. आज होणाऱ्या जाहीर सभेमध्ये उपमुख्यमंत्री एकनाथ शिंदे कोणता ‘बूस्टर डोस’ देणार? याकडे केवळ कार्यकर्त्यांचेच नव्हे, तर संपूर्ण जिल्ह्याचे लक्ष लागले आहे.

नेतृत्वाला मोठे पाठबळ मिळणार?

पालिका निवडणूक प्रचार शुभारंभाच्या भाषणात श्रीमंत संजीवराजे नाईक निंबाळकर यांनी आता जे काही होईल ते शिवसेनेतच असा आपला अंतिम निर्णय झाला असल्याचे बोलून दाखवले होते. त्या पार्श्‍वभूमीवरआचारसंहितेच्या मर्यादा लक्षात घेता शहर विकासासाठी ठोस घोषणा करण्याची मर्यादा असली तरी, राजे गटाच्या नेतृत्त्वाला शिवसेनेच्या माध्यमातून कशा प्रकारे पाठबळ आणि मोठी संधी भेटणार? याबाबतची काही महत्त्वाची घोषणा होणार का? याबद्दल कार्यकर्त्यांना मोठी उत्सुकता आहे. उपमुख्यमंत्री शिंदे यांच्या उपस्थितीमुळे फलटण शहर विकासाला गती देण्यासाठी राजे गटाला राजकीय बळ मिळणार असल्याचे संकेत स्पष्ट आहेत, ज्यामुळे शहरातील राजकीय संघर्ष अधिक रोमांचक झाला आहे.