पोलीस अधीक्षक तुषार दोशी यांच्या पुढाकारातून फलटण उपविभागाला मिळाली सुसज्ज फिरती सीसीटीव्ही यंत्रणा; गर्दी आणि वाहतुकीवर नियंत्रण मिळवणे होणार सोपे.
। लोकजागर । फलटण । २६ मार्च २०२६ ।
फलटण शहर आणि तालुक्यात वाढती लोकसंख्या, वाहतुकीची कोंडी आणि विविध सामाजिक व धार्मिक कार्यक्रमांमुळे कायदा व सुव्यवस्थेचे आव्हान दिवसेंदिवस वाढत आहे. हे आव्हान पेलण्यासाठी आणि पोलिसांच्या बंदोबस्त दलाची क्षमता वाढवण्यासाठी फलटण उपविभागाला आता अत्याधुनिक ‘सर्व्हिलन्स व्हॅन’ (निरीक्षण वाहन) मिळाली आहे. सातारा जिल्हा पोलीस अधीक्षक तुषार दोशी यांच्या विशेष मान्यतेने ही हायटेक व्हॅन फलटण शहर पोलीस ठाण्याच्या ताफ्यात दाखल झाली असून, यामुळे गुन्हेगारी नियंत्रण आणि गर्दीच्या व्यवस्थापनाला मोठी मदत होणार आहे.
या अत्याधुनिक व्हॅनच्या चारही बाजूंना उच्च-प्रतिचे सीसीटीव्ही कॅमेरे आणि शक्तिशाली सर्च लाईट बसविण्यात आले आहेत. व्हॅनच्या आतमध्ये एक मोठी स्क्रीन बसविण्यात आली असून, त्याद्वारे संपूर्ण परिसराचे ३६० अंश कोनातून सूक्ष्म निरीक्षण करणे शक्य होणार आहे. बंदोबस्तादरम्यान उद्भवणाऱ्या तातडीच्या परिस्थितीत मदत व्हावी म्हणून या वाहनामध्ये प्राथमिक उपचार पेटी, स्ट्रेचर, पिण्याचे पाणी आणि अग्निशमन यंत्र (फायर एक्स्टिंग्विशर) यांसारख्या सुरक्षाविषयक सुविधाही उपलब्ध करून देण्यात आल्या आहेत. तसेच, यामध्ये बसविण्यात आलेल्या पी.ए. (Public Address) सिस्टीममुळे मोठ्या गर्दीत किंवा उत्सवांमध्ये नागरिकांना तातडीच्या सूचना देणे अधिक सुलभ होणार आहे.
महत्त्वाच्या बंदोबस्तावेळी किंवा कायदा व सुव्यवस्था धोक्यात येण्याच्या परिस्थितीत ही व्हॅन अत्यंत प्रभावी ठरणार असून, पोलिसांचा प्रतिसाद यामुळे अधिक सक्षम आणि वेगवान होईल, अशी अपेक्षा व्यक्त केली जात आहे. आज दिनांक २५ मार्च २०२६ रोजी मोटार परिवहन विभाग, सातारा येथील अधिकारी आणि अंमलदारांनी फलटण विभागातील पोलीस अधिकारी व कर्मचाऱ्यांना या व्हॅनच्या हाताळणीचे सविस्तर तांत्रिक प्रशिक्षण दिले. ही महत्त्वाची सुविधा फलटणला उपलब्ध करून दिल्याबद्दल पोलीस अधीक्षक तुषार दोशी, अपर पोलीस अधीक्षक डॉ. वैशाली कडुकर आणि उपविभागीय पोलीस अधिकारी विशाल खांचे यांचे पोलीस दलाच्या वतीने आभार मानण्यात आले आहेत.
