। लोकजागर । फलटण । दि. 29 जुलै 2025 ।
येथील पत्रकार तथा ग्राहक चळवळीतील कार्यकर्ते किरण बोळे यांना ग्राहक पंचायतीच्यावतीने देण्यात येणार्‍या ‘उत्कृष्ट कार्यकर्ता’ पुरस्काराने सन्मानित करण्यात आले.
धाराशिव येथील दोन दिवसीय राज्यस्तरीय अधिवेशनात ग्राहक पंचायत महाराष्ट्र संघटनेच्या कार्यकर्त्यांसाठी ‘उत्कृष्ट कार्यकर्ता’ पुरस्कार वितरण सोहळा पार पडला. त्यामध्ये किरण बोळे यांनाही पुरस्कार प्रदान करण्यात आला. यावेळी ग्राहक पंचायतीचे राज्याध्यक्ष डॉ. विजय लाड, राज्य सचिव अरुण वाघमारे, राज्य संघटक सर्जेराव जाधव, सह संघटिका मेधा कुलकर्णी, कोषाध्यक्षा सुनिता राजेघाटगे, सहसचिव प्रा. एस.एन. पाटील, सदस्य प्रमोद कुलकर्णी, धाराशिव जिल्हाध्यक्ष अजित बागडे सह इतर मान्यवर उपस्थित होते.
‘‘देशातच नव्हे तर संपूर्ण जगात ग्राहक हा शोषणमुक्त झाला पाहिजे, ही ग्राहक चळवळीची मुख्य भूमिका आहे. ग्राहक पंचायत महाराष्ट्रला एक वैभव मानले गेले, कारण ही संघटना शोषणमुक्त समाज निर्माण करण्याच्या उद्देशाने कार्यरत आहे. ग्राहकतीर्थ बिंदूमाधव जोशींच्या समर्पित भावनेने काम करणारे कार्यकर्ते हे ग्राहक पंचायत महाराष्ट्र संघटनेचे खरे वारसदार आहेत. कार्यकर्त्यांचा दृष्टिकोन संकुचित न राहता व्यापक असावा, समाजासाठी सेवा करण्याची त्यांची भूमिका अधिक स्पष्ट आणि प्रभावी असावी. आजच्या पुरस्कारांनी अन्य कार्यकर्त्यांना प्रेरणा मिळेल व तेही मनापासून काम करतील’’, असे प्रतिपादन यावेळी अध्यक्षीय भाषणात डॉ. विजय लाड यांनी व्यक्त केले.
दोन दिवसीय अधिवेशनास राज्यभरातून ग्राहक पंचायतीचे पदाधिकारी, सदस्य व कार्यकर्ते मोठ्या संख्येने उपस्थित होते. अधिवेशनाचे संचलन वसुधा जहागीरदार यांनी केले तर आभार प्रदर्शन प्रा. पूनम तापडिया यांनी केले.
