। लोकजागर । फलटण । दि. २३ नोव्हेंबर २०२५ ।
शेतकऱ्यांसाठी दिलासादायक बातमी आहे! बाजारामध्ये मका या शेतमालाचे भाव पडल्यामुळे फलटण तालुक्यातील शेतकऱ्यांसाठी कृषी उत्पन्न बाजार समिती, फलटण येथे आधारभूत किंमत धान्य खरेदी योजनेंतर्गत (हमीभाव) मका खरेदी केंद्र सुरू करण्याचा निर्णय घेण्यात आला आहे. या केंद्रावर शासनाच्या किमान आधारभूत किंमत खरेदी योजनेंतर्गत मक्याची खरेदी प्रतिक्विंटल २४०० रुपये हमीभावाने केली जाणार आहे, असे समितीचे चेअरमन श्रीमंत रघुनाथराजे नाईक निंबाळकर यांनी सांगितले.
हंगाम २०२५-२६ साठी मका खरेदीकरिता नावनोंदणी सुरू झाली आहे. उपचेअरमन श्री. भगवानराव होळकर यांनी ज्या शेतकऱ्यांनी अद्याप ऑनलाईन नोंदणी केलेली नाही, त्यांनी मुदतीत नावनोंदणी करावी, असे आवाहन केले आहे. मका खरेदी केंद्र सुरू करण्यासाठी फलटण तालुका सहकारी खरेदी विक्री संघाची उपअभिकर्ता (सब एजंट) म्हणून निवड करण्यात आली आहे.
मक्याचा हमीभाव २४०० रुपये प्रति क्विंटल असून, शेतमाल स्वच्छ करण्यासाठी बाजार समितीच्या स्वच्छता-प्रतवारी युनिटवर (क्लीनिंग ग्रेडिंग युनिटवर) सशुल्क सुविधा उपलब्ध आहे. खरेदीसाठी आणलेल्या मक्याची आर्द्रता (ओलावा) जास्तीत जास्त १४ टक्के असणे आवश्यक आहे. सन २०२५-२६ च्या खरीप हंगामाची ७/१२ उताऱ्यावर मका पिकाची नोंद असणे आवश्यक आहे. आधार लिंक केलेला भ्रमणध्वनी क्रमांक, आधार कार्ड आणि बँकेचे पासबुक घेवून शेतकऱ्यांनी प्रथम आपल्या पिकाची नोंदणी करून घ्यावी. नोंदणी प्रक्रिया पीओएस मशीनद्वारे ऑनलाईन पद्धतीने करण्यात येणार असून, नोंदणीची शेवटची तारीख ३० नोव्हेंबर २०२५ आहे.
बाजार समितीचे सचिव शंकरराव सोनवलकर यांनी सांगितले की, ऑनलाईन नोंदणी केलेल्या शेतकऱ्यांना एसएमएसद्वारे शेतमाल आणण्याची तारीख कळविण्यात येणार आहे, त्याच दिवशी त्यांनी खरेदी केंद्रावर माल आणावा. हमीभाव खरेदी बाबत अधिक माहितीसाठी फलटण तालुका सहकारी खरेदी विक्री संघाचे व्यवस्थापक श्री. विठ्ठल जाधव (भ्र. क्र. ७९७२४१७५४६) आणि समितीचे प्रतवारी करणारे अधिकारी (ग्रेडर) श्री. कृष्णात सस्ते (भ्र. क्र. ९८९०४५६८२४) यांचेशी संपर्क साधण्याचे आवाहन करण्यात आले आहे.
