। लोकजागर । फलटण । दि. 26 नोव्हेंबर 2025 ।
फलटण शहरात पालिका निवडणुकीच्या प्रचाराने आता खऱ्या अर्थाने जोर धरला असून, प्रत्येक प्रभागात उमेदवारांनी पायाला भिंगरी लावून मतदारांच्या गाठीभेठी घेण्यास सुरुवात केली आहे. अंगावर गुलाल पाडून घेण्यासाठी आणि मतदारांचे आशीर्वाद घेण्यासाठी त्यांच्यासमोर अक्षरशः नतमस्तक होण्याची स्पर्धा सध्या शहरात पाहायला मिळत आहे. हे चित्र बघून मतदारांना कधी हसू आवरत नाही तर कधी त्यांच्या या धडपडीबद्दल आश्चर्यही वाटत आहे.
उमेदवारी अर्ज भरण्यापासून ते प्रचाराच्या शेवटच्या टप्प्यापर्यंत प्रत्येक उमेदवाराने हायटेक प्रचाराचे तंत्र प्रभावीपणे स्वीकारले आहे. फोटोग्राफी, शूटिंग आणि सोशल मीडियावरील आकर्षक व्हिडीओंचा वापर करून प्रचाराचा मोठा भपका उडवून देण्याचा प्रयत्न प्रत्येक प्रभागात दिसत आहे. मात्र, हा संपूर्ण प्रचार एखाद्या फिल्मी स्टाईलने सुरू असल्यामुळे सर्वसामान्य नागरिक या संपूर्ण ‘शो’कडे गंमत म्हणून पाहत आहेत.
या ‘चकाचक’ आणि केवळ देखाव्याच्या प्रचारादरम्यान मतदारांमध्ये मात्र वेगळीच चर्चा जोर धरत आहे. हा सगळा दिखावा तात्पुरता असून, निवडणुकीनंतर आपले मूलभूत प्रश्न कोण सोडवणार, अशी जनमाणसात चर्चा चालू आहे. “रस्ते, पाणी आणि इतर कामांचं नक्की कोण बोलणार आहे? नुसते फोटो आणि व्हिडिओ टाकून काही होणार नाही,” अशी थेट प्रतिक्रिया मतदारांकडून ऐकायला मिळत आहे. त्यामुळे, प्रचार कामाचा नाही तर नावाचा सुरू असल्याबद्दल नागरिकांमध्ये नाराजीचा सूर आहे.
एकंदरीत, फलटणच्या नागरिकांना आता विकासाचे खऱ्या कामाचे आश्वासन देणारा आणि गोंडस शब्दांत न फसवणारा उमेदवार हवा आहे. उमेदवारांनी प्रचाराचा कितीही मोठा गजर केला असला तरी, येत्या काही दिवसांत मतदार राजा कोणाच्या ‘भपक्या’ला थारा देतो आणि कोणाच्या ‘कामाच्या’ शब्दांना मत देतो, हे स्पष्ट होईल.
