। लोकजागर । फलटण । दि. ३० नोव्हेंबर २०२५ ।
फलटण नगरपालिकेच्या निवडणुकीत मोठा ‘गोंधळ’ झाल्यामुळे अवघ्या तीन दिवसांवर आलेले मतदान तब्बल २१ दिवस पुढे ढकलले आहे. उमेदवारी अर्ज छाननी प्रक्रियेविरोधात जिल्हा न्यायालयात दाखल झालेल्या अपीलावर निर्धारीत वेळेत प्रक्रिया पूर्ण न झाल्याचा फटका या संपूर्ण निवडणूक प्रक्रियेला बसला आहे. यामुळे २ डिसेंबरला होणारे मतदान आता २० डिसेंबरला होणार असून, निकाल ३ डिसेंबर ऐवजी २१ डिसेंबरला लागणार आहे!
७८ उमेदवारांना ‘पुन्हा प्रचार’ करण्याची वेळ
फलटण पालिका नगराध्यक्ष (१) आणि नगरसेवक (२७) पदासाठी एकूण ७८ उमेदवार रिंगणात आहेत. या सर्वांनी गेल्या २५ तारखेपासून आपली प्रचार यंत्रणा पूर्ण ताकदीने सुरू केली होती. नुसत्या दोन दिवसांपूर्वीच शिवसेनेची उपमुख्यमंत्री एकनाथ शिंदे यांची भव्य जाहीर सभाही पार पडली होती. घरोघरी संपर्क, प्रचार पत्रकांचे वाटप, फिरत्या वाहनांद्वारे प्रचार… सगळी यंत्रणा ‘ऑन’ मोडवर असताना अचानक निवडणूक पुढे गेल्याने, अधिकृतरित्या लाखाच्या बाहेर खर्च झालेल्या या ७८ उमेदवारांवर ही ‘खर्चाची कुऱ्हाड’ विनाकारण कोसळली आहे.
वाढलेले दिवस ‘संधी’ की ‘डोकेदुखी’?
उमेदवारांना अर्ज प्रक्रिया पुन्हा करण्याची गरज नसली तरी, आता त्यांना नवीन कार्यक्रमानुसार प्रचार यंत्रणा पुन्हा नव्याने आखावी लागणार आहे. एकीकडे, मतदारांपर्यंत पोहोचण्यासाठी हे वाढीव दिवस प्रचाराची संधी म्हणून पाहिले जात असले तरी, यामुळे पुन्हा वाढणारा खर्च ही मोठी डोकेदुखी असणार आहे. “इतका दिवस कशाला प्रचार करायचा?” असा प्रश्न अनेक उमेदवारांना पडला असून, त्यांच्या तोंडचे पाणी पळाले आहे.
सुधारित निवडणूक कार्यक्रम
निवडणूक पुढे गेल्यामुळे आता सुधारित कार्यक्रम असा असेल:
- निवडणूक कार्यक्रम जाहीर होणार: दि. ४ डिसेंबर २०२५
- अर्ज माघारी घेण्याचा अंतिम दिनांक: दि. १० डिसेंबर २०२५
- चिन्ह वाटप: दि. ११ डिसेंबर २०२५
- मतदान: दि. २० डिसेंबर २०२५
- मतमोजणी: दि. २१ डिसेंबर २०२५
