। लोकजागर । फलटण । दि. ०४ एप्रिल २०२५ ।
ऐतिहासिक पार्श्‍वभूमी असलेल्या फलटण येथील मुधोजी मनमोहन राजवाड्यास कोल्हापूर परीक्षेत्राचे विशेष पोलीस महानिरीक्षक सुनील फुलारी यांनी सदिच्छा भेट दिली. फलटणचा हा ऐतिहासिक राजवाडा पाहून विशेष पोलीस महानिरीक्षक सुनील फुलारी यांनी आनंद व्यक्त केला. त्यांनी महेश ढवळे यांच्याकडून राजवाड्याची माहिती घेऊन सर्व प्रमुख स्थळे पाहिली.
यावेळी सातार्‍याचे पोलीस अधीक्षक समीर शेख, अतिरिक्त पोलीस अधीक्षक सौ.वैशाली कडूकर, फलटणचे उपविभागीय पोलीस अधिकारी राहुल धस व फलटण शहर पोलीस स्टेशनचे पोलीस निरीक्षक हेमंतकुमार शहा उपस्थित होते. प्रारंभी फलटण पंचायत समितीचे माजी सभापती श्रीमंत विश्‍वजीतराजे नाईक निंबाळकर यांनी उपस्थित सर्व मान्यवरांचे स्वागत केले.
श्रीमंत छत्रपती सईबाई राणीसाहेबांचे माहेर आणि श्रीमंत छत्रपती संभाजी महाराजांचे आजोळ असलेला हा राजवाडा ऐतिहासिक वास्तुकलेचा उत्तम असा नमुना आहे.आजच्या काळातही या राजवाड्याचे केलेले संरक्षण आणि जतन राज्यातील इतिहास प्रेमींना निश्‍चित स्फूर्ती आणि प्रेरणा देणारे आहे असे नमूद करून येथील संस्थानिकांचे त्यांनी विशेष कौतुक केले.
फलटण हे संस्थान म्हणून ओळखले जाते आणि येथील मुधोजी मनमोहन राजवाडा ही वास्तू त्याच्या ऐतिहासिक वास्तुकलेचा उत्तम असा नमुना आहे. श्रीमंत छत्रपती संभाजी महाराजांचे आजोळ म्हणूनही हा राजवाडा प्रसिद्ध आहे. या राजवाड्याच्या माध्यमातून फलटणचा इतिहास इतिहास प्रेमींना सहज उपलब्ध होतो. हा राजवाडा सध्या दूरचित्रवाणी मालिका आणि चित्रपटांच्या चित्रीकरणाच्या केंद्रस्थानी आहे.
