माजी खासदार रणजितसिंह नाईक निंबाळकर व आमदार सचिन पाटील यांच्या उपस्थितीत सोहळा संपन्न; नगराध्यक्ष समशेरसिंह नाईक निंबाळकर यांची प्रमुख उपस्थिती.
। लोकजागर । फलटण । २४ एप्रिल २०२६ ।
शहरातील मलठण येथील प्रभाग क्रमांक ५ मध्ये नागरी सुविधांचा दर्जा उंचावण्यासाठी विविध विकासकामांचे शानदार भूमिपूजन करण्यात आले. यामध्ये रस्ते काँक्रीटीकरण, भूमिगत लघुदाब आणि उच्चदाब विद्युत वाहिन्या टाकणे यासह अन्य महत्त्वपूर्ण कामांचा समावेश असून, यामुळे परिसरातील विद्युत पुरवठा अधिक सुरक्षित आणि रस्ते दर्जेदार होणार आहेत.
हा सोहळा माजी खासदार रणजितसिंह नाईक निंबाळकर, आमदार सचिन पाटील आणि नगराध्यक्ष समशेरसिंह नाईक निंबाळकर यांच्या प्रमुख उपस्थितीत पार पडला. यावेळी पंचायत समिती सदस्य धनंजय साळुंखे पाटील, युवा नेते अमरसिंह नाईक निंबाळकर, ज्येष्ठ विधीतज्ञ ॲड. नरसिंह निकम यांची विशेष उपस्थिती होती.
सर्वसमावेशक विकासाचा निर्धार: कार्यक्रमाचे प्रास्ताविक ज्येष्ठ नगरसेवक अशोकराव जाधव यांनी केले. त्यांनी प्रभागातील प्रलंबित प्रश्नांची माहिती देत या विकासकामांच्या महत्त्वावर प्रकाश टाकला. भूमिगत विद्युत वाहिन्यांमुळे या भागातील धोकादायक तारांचे जाळे संपुष्टात येणार असून, काँक्रीटीकरणामुळे पावसाळ्यातील चिखलाचा त्रासही कायमचा दूर होईल, असा विश्वास मान्यवरांनी व्यक्त केला.
मान्यवरांची मांदियाळी: या कार्यक्रमाला नगरसेवक रोहित नागटिळे, किरण राऊत, राहुल निंबाळकर, सचिन अहिवळे, अमित भोईटे, तसेच नगरसेविका सौ. कांचन दत्तराज व्हटकर यांची उपस्थिती होती. यासोबतच माजी नगरसेवक अनुप शहा, सुरेश पवार, तेजसिंह भोसले, अमोल सस्ते, प्रतापसिंह नाईक निंबाळकर, भाजप नेते बजरंग गावडे आणि फलटण शहरातील सर्व नगरसेवक, भाजप पदाधिकारी व कार्यकर्ते मोठ्या संख्येने उपस्थित होते.
कार्यक्रमाच्या यशस्वीतेसाठी परिसरातील नागरिकांनी मोठी गर्दी केली होती. शेवटी नगरसेवक रोहित नागटिळे यांनी उपस्थित मान्यवर आणि नागरिकांचे आभार मानले. या विकासकामांच्या शुभारंभामुळे मलठणवासीयांमध्ये समाधानाचे वातावरण पाहायला मिळत आहे.
