इस्कॉनच्या भगवद्गीता स्पर्धेत फलटण व माण तालुक्यात प्रथम आल्याने झाली होती इस्रो भेटीसाठी निवड; भारतातील ५० अव्वल विद्यार्थ्यांमध्ये मिळवले स्थान.
। लोकजागर वृत्त । फलटण । ११ जुलै २०२६ ।
श्रीराम एज्युकेशन सोसायटी संचालित फलटण येथील यशवंतराव चव्हाण हायस्कूल व जुनिअर कॉलेजची इयत्ता दहावीची हुशार विद्यार्थिनी कु. श्रीनी मयूर तगारे हिने राष्ट्रीय स्तरावर फलटणच्या शिरपेचात मानाचा तुरा रोवला आहे. फलटण येथील इस्कॉन (ISKCON) संस्थेच्या वतीने आयोजित करण्यात आलेल्या अत्यंत प्रतिष्ठेच्या भगवद्गीता स्पर्धेत श्रीनी हिने फलटण आणि माण तालुक्यातून प्रथम क्रमांक पटकावला होता. तिच्या या घवघवीत यशामुळे तिची बेंगलोर येथील भारतीय अंतराळ संशोधन संस्थेच्या (ISRO) विशेष भेटीसाठी अधिकृत निवड करण्यात आली होती. नुकत्याच बेंगलोर येथे आयोजित करण्यात आलेल्या एका अत्यंत भव्य आणि दिमाखदार राष्ट्रीय समारंभात इस्रोचे माजी अध्यक्ष तथा एरोनॉटिकल सोसायटी ऑफ इंडियाचे विद्यमान राष्ट्रीय अध्यक्ष डॉ. सोमनाथन यांच्या हस्ते श्रीनी तगारे हिला ‘नॅशनल टॉपर्स अवॉर्ड’ (राष्ट्रीय सुवर्णपदक) देऊन अत्यंत गौरवपूर्वक सन्मानित करण्यात आले. बेंगलोर येथील या विशेष गौरव सोहळ्यासाठी संपूर्ण भारतातून केवळ ५० अव्वल (टॉपर्स) विद्यार्थ्यांची निवड करण्यात आली होती, ज्यामध्ये श्रीनीने आपले स्थान निश्चित केले.
श्रीनी मयूर तगारे हिने मिळवलेल्या या अभूतपूर्व आणि ऐतिहासिक यशाबद्दल श्रीराम एज्युकेशन सोसायटीच्या अध्यक्षा सविता सुभाषराव सूर्यवंशी-बेडके, संस्थेचे मानद सचिव डॉ. सचिन सुभाषराव सूर्यवंशी-बेडके, नियामक मंडळाचे सदस्य महेंद्र सुभाषराव सूर्यवंशी-बेडके आणि ज्योती सचिन सूर्यवंशी-बेडके यांनी तिचे विशेष कौतुक करून अभिनंदन केले आहे. तसेच यशवंतराव चव्हाण हायस्कूल व जुनिअर कॉलेजच्या प्राचार्या गायकवाड आणि उपप्राचार्य घनवट यांनीही श्रीनीच्या या यशाचा विद्यालयाला सार्थ अभिमान असल्याचे सांगत तिला पुढील उज्ज्वल भवितव्यासाठी मनःपूर्वक शुभेच्छा दिल्या आहेत.
भगवद्गीतेसारख्या पवित्र ग्रंथातील जीवनमूल्यांचा अभ्यास करून ग्रामीण भागातील एका विद्यार्थिनीने थेट इस्रोच्या शास्त्रज्ञांच्या उपस्थितीत राष्ट्रीय सुवर्णपदक पटकावल्यामुळे संपूर्ण फलटण तालुक्यातून आणि शैक्षणिक वर्तुळातून श्रीनी तगारे हिच्यावर कौतुकाचा व अभिनंदनाचा वर्षाव होत आहे.
