| लोकजागर | फलटण | दि. १३ एप्रिल २०२५ |
क्रांतिसूर्य महात्मा फुले यांच्या १९८ व्या जयंती निमित्त फलटण येथील क्रांतिभूमी महात्मा फुले स्मारक येथे जयंती निमित्त विविध सामाजिक व राजकीय लोकांनी तसेच फुले प्रेमींनी अभिवादन केले. यामध्ये विधानपरिषदेचे माजी सभापती आमदार श्रीमंत रामराजे नाईक निंबाळकर, फलटण – कोरेगावचे आमदार सचिन पाटील, कृष्णा खोरे महामंडळाचे संचालक माणिकराव सोनवलकर, फलटणचे तहसीलदार डॉ. अभिजित जाधव, फलटण नगरपरिषेचे मुख्याधिकारी निखिल मोरे, फलटण शहर पोलिस निरीक्षक हेमंतकुमार शहा, निवासी नायब तहसीलदार अभिजित सोनवणे, भाजपाचे जेष्ठ नेते समशेरसिंह नाईक निंबाळकर, श्रीमंतअनिकेतराजे नाईक निंबाळकर, युवा नेते अमरसिंह नाईक निंबाळकर, श्रीराम सहकारी साखर कारखान्याचे चेअरमन डॉ. बाळासाहेब शेंडे, मिलिंद नेवसे, विवेक शिंदे, शंकर आप्पा माडकर यांनी अभिवादन केले.
फलटण येथे नव्याने सुशोभित केलेल्या महात्मा जोतिबा फुले यांचे स्मारक फलटण नगरपरिषदेच्या स्वाधीन करत क्रांतिसूर्य महात्मा फुले जयंती उत्सव समितीने एक नवा आदर्श घालून दिला आहे. शासनाचा कोणताही निधी न घेता लोकवर्गणीतून व लोकप्रतिनिधी यांच्या सहकार्याने हे स्मारक पूर्ण झाले आहे. फलटण येथे या स्मारकाचे हस्तांतरण जयंती उत्सव समितीकडून फलटण नगरपालिकेचे मुख्याधिकारी निखिल मोरे यांचेकडे करण्यात आले.
महात्मा फुले यांना अभिवादन करण्यासाठी फलटण मधील विविध सामाजिक संघटना व फुले प्रेमींनी गर्दी केली होती. सकाळी पाच वाजता तालुक्यातून १०० सायकल स्वार सहभागी होत फलटण ते तरडगाव अशी समता सायकल रॅली काढण्यात आली. ठीक ठिकाणी या रॅलीचे स्वागत फुले प्रेमींनी केले. या रॅलीत तरुण तसेच जेष्ठ नागरिकांनीही भाग घेतला होता. क्रांतिज्योती सावित्रीबाई फुले सामाजिक शैक्षणिक विचारमंच, चौधरवाडी यांनी ही रॅली आयोजित केली होती. यामध्ये तुकाराम कोकाटे, राधेश्याम खंडेलवाल, चंद्रकांत मिसाळ यांनी सहभाग घेतला.
सकाळी दहा वाजता फलटण शहरातून महिला व तरुणींनी भव्य बाईक रॅली काढली होती. यामध्ये हजारो महिला व तरुण सहभागी झाले होते. शहरातील मुख्य मार्गावरून ही रॅली महात्मा फुले स्मारक येथे विसर्जित झाली.
पुतळ्याच्या संरक्षक भिंतीवर फुले विचार …
महात्मा फुले यांचे विचार त्यांच्या साहित्यातून दिसतात. अखंड काव्यातून अनेक प्रबोधनकारी विचार त्यांनी मांडले. फलटण येथील महात्मा फुले स्मारकाच्या संरक्षक भिंतीवर हे विचार कोरल्याने एक आदर्श निर्माण झाला असून सर्व फलटणकर नागरिकांनी स्मारक पाहण्यासाठी विशेष गर्दी केली होती.
