हजारोंच्या उपस्थितीत राजे गटाचा शिवसेनेत जाहीर प्रवेश
। लोकजागर । फलटण । दि. 28 नोव्हेंबर 2025 ।
‘‘फलटणचं नाव देशभरात गाजे, धनुष्यबाणाचं बटण दाबा; निवडून आणा श्रीमंत अनिकेतराजे’’; अशा अनोख्या शैलीत राज्याचे उपमुख्यमंत्री ना. एकनाथ शिंदे यांनी फलटणकरांना भरगच्च जाहीर सभेत शिवसेना व आघाडीच्या सर्व उमेदवारांना निवडून आणण्याचे आवाहन केले.
राजे गटाचा शिवसेना पक्षात जाहीर प्रवेश आणि फलटण नगरपरिषद निवडणूकीतील नगराध्यक्षपदाचे उमेदवार श्रीमंत अनिकेतराजे नाईक निंबाळकर व शिवसेना – आघाडीच्या उमेदवारांच्या प्रचारार्थ शहरातील गजानन चौकात आयोजित जाहीर सभेत ना. एकनाथ शिंदे बोलत होते. व्यासपीठावर महाराष्ट्र विधान परिषदेचे माजी सभापती आ. श्रीमंत रामराजे नाईक निंबाळकर, पर्यटन मंत्री तथा सातारा जिल्ह्याचे पालकमंत्री ना. शंभूराज देसाई, आमदार महेश शिंदे, श्रीमंत संजीवराजे नाईक निंबाळकर, श्रीमंत रघुनाथराजे नाईक निंबाळकर, माजी आमदार दीपक चव्हाण, श्रीमंत सौ. शिवांजलीराजे नाईक निंबाळकर, श्रीमंत सुभद्राराजे नाईक निंबाळकर, श्रीमंत विश्‍वजीतराजे नाईक निंबाळकर, शिवसेना सातारा संपर्क प्रमुख शरद कणसे, जिल्हाध्यक्ष चंद्रकांत जाधव यांच्यासह स्थानिक शिवसेना पदाधिकारी, पालिका निवडणूकीतील सर्व उमेदवार आदींची उपस्थिती होती.
शेर कभी बुढा नही होता : एकनाथ शिंदेंची श्रीमंत रामराजेंवर स्तुतीसुमने
‘‘फलटण नगरपरिषद म्हणजे श्रीमंत रामराजे नाईक निंबाळकर आहे. नगराध्यक्ष म्हणून सुरुवात केलेल्या श्रीमंत रामराजेंनी राज्याच्या राजकारणात पुढे मोठी झेप घेतली. विधानपरिषदेच सर्वोच्च पद त्यांनी भूषवलं आहे. काही जणांनी त्यांच्या विरोधात कटकारस्थानं केली पण मी एक सांगतो ‘शेर कभी बुढा नही होता है । चाहे वो जंगल का हो या राजनिती का हो । शेर शेर ही रहेता है । रामराजेंनी सुरु केलेले विकासपर्व आपल्याला श्रीमंत अनिकेतराजेंच्या माध्यमातून पुढं न्यायचं आहे’’, असे आवाहन ना. शिंदे यांनी फलटणकरांना केले.
खोट्या तक्रारी घेऊ नका : एकनाथ शिंदेंनी अधिकार्‍यांना खडसावले
‘‘इथे मी आज सभा घेण्यासाठी नाही तर भयमुक्त आणि दहशतमुक्त फलटण देण्यासाठी मी आलो आहे. तक्रार केली केली इथे खोटे गुन्हे दाखल होतात; असे काही अर्ज इथे माझ्याकडे आले आहेत. अधिकार्‍यांनी अशा दबावाला बळी पडू नये, खोट्या तक्रारी दाखल करु नये. जर आमच्या कार्यकर्त्यांशी अन्याय झाला तर गाठ माझ्याशी आहे. कोणी काय काय केलं आहे ते सगळं मला माहित आहे. मी शांत आहे; मला शांतच राहू द्या. माझ्यात जर कुणी आडवा आला तर त्याला मी आडवा केल्याशिवाय राहत नाही’’, असा इशारा ना. एकनाथ शिंदे यांनी दिला.
उपजिल्हा रुग्णालय, एमआयडीसी आणि प्रवेशद्वारासाठी
जाहीर सभेतूनच एकनाथ शिंदेंचे दोन फोन
फलटणच्या उपजिल्हा रुग्णालयाचे विस्तारीकरण (100 बेडचे) करायचे आहे. त्यासाठी फलटणला येवून पालकमंत्री, श्रीमंत रामराजे आणि श्रीमंत अनिकेतराजेंना सोबत बैठक घ्या, असा थेट फोन आरोग्यमंत्री प्रकाश आबीटकर यांना ना. एकनाथ शिंदे यांनी सभेतूनच लावला. तर सुरवडी येथील एम.आय.डी.सी. च्या विस्तारीकरणासाठी उद्योग मंत्री ना. उदय सामंत यांना फोन लावून त्यासंबंधीचे आदेश दिले. तसेच फलटण शहराच्या चारही बाजूला भव्य दिव्य प्रवेशद्वार उभारायचे आहेत याबाबतही त्यांनी मंत्री सामंत यांना सूचना दिल्या.
पोलीस चौकीच्या राजकारणाविरोधात ताकद द्या : श्रीमंत रामराजे
‘‘सातारा जिल्ह्याची राजकीय संस्कृती नष्ट झाली आहे. एकनाथ शिंदेंनी आपले खंबीर नेतृत्त्व दिल्लीपर्यंत तयार केलं आहे. ते नेतृत्त्व आपला जिल्हा पुर्ववत करेल. इथं प्रशासकीय दहशतीचं राजकारण कधी झालं नव्हतं. हे काम कुठला पक्ष करत नाहीये पण काही व्यक्ती करत आहेत. हा जिल्हा, फलटण शहर आम्ही फुलासारखं सांभाळलं आहे. जिल्ह्यात जे काही करायचं आहे ते आपण करु. मला कुठलीही राजकीय महत्त्वाकांक्षा नाही. फक्त पोलीस चौकीच राजकारण झालं तर आम्हाला ताकद द्या; आमचं हे घर, कुटुंब सुरक्षित ठेवा’’, असे आवाहन आ. श्रीमंत रामराजे नाईक निंबाळकर यांनी यावेळी बोलताना केले.
यावेळी श्रीमंत रघुनाथराजे नाईक निंबाळकर, श्रीमंत संजीवराजे नाईक निंबाळकर यांच्यासह शिवसेना पदाधिकारी, कार्यकर्त्यांची भाषणे झाली.
