। लोकजागर । फलटण । दि. २५ फेब्रुवारी २०२५ ।
पर्यटन, खनिकर्म व माजी सैनिक कल्याण मंत्री तथा पालकमंत्री शंभूराज देसाई यांच्या उपस्थितीत गुरुवार दि. २७ फेब्रुवारी रोजी दुपारी १ : ०० वाजता जिल्हाधिकारी कार्यालयातील नियोजन भवनात जनता दरबाराचे आयोजन करण्यात आले आहे.या जनता दरबाराला जिल्ह्यातील विविध विभागांचे विभाग प्रमुख उपस्थित राहणार आहे. तरी नागरिकांनी या जनता दरबाराचा लाभ घेऊन प्रलंबित प्रश्न असतील ते जनता दरबारात मांडाव्यात, असे आवाहन करण्यात आले आहे. दरम्यान; या जनता दरबाराला विभाग प्रमुखांनीच उपस्थित रहावे, असे निर्देश जिल्हाधिकारी संतोष पाटील यांनी दिले आहेत.
पालकमंत्री श्री. देसाई यांच्या अध्यक्षतेखाली २७ फेब्रुवारी रोजी होणार्‍या जनता दरबारा संदर्भात जिल्हाधिकारी श्री. पाटील यांनी पूर्वतयारीबाबत आढावा घेतला. या दूरदृष्य प्रणालीद्वारे झालेल्या बैठकीला अपर जिल्हाधिकारी जीवन गलांडे, निवासी उपजिल्हाधिकारी नागेश पाटील यांच्यासह विविध विभागांचे प्रमुख उपस्थित होते.
जनता दरबारात येणार्‍या तक्रारी, निवेदने यांची नोंद करुन संकलन करावे, असे निर्देश देवून जिल्हाधिकारी श्री. पाटील म्हणाले, २७ फेब्रुवारी रोजी आयोजित करण्यात येणार्‍या जनता दरबारात मोठ्या प्रमाणात नागरिक उपस्थित राहून आपले प्रश्न मांडणार आहेत. मांडण्यात येणारा प्रत्येक प्रश्न विभाग प्रमुखांनी एकून घ्यावा व त्यावर कार्यवाही करावी. लोकशाही दिनाच्या धर्तीवर जनता दरबाराचे आयोजन करण्यात येणार आहे. विभाग प्रमुखांनी आपल्या सोबत एक संगणक व प्रिंटरची व्यवस्था करावी. पालकमंत्री शंभूराज देसाई यांच्या अध्यक्षतेखाली आयोजित जनता दरबारामध्ये येणार्‍या प्रत्येक तक्रारी व निवेदनावर कायद्यानुसार व नियमानुसार योग्य तो निर्णय तात्काळ घेऊन तो संबंधिताला कळवावा, अशाही सूचना जिल्हाधिकारी श्री. पाटील यांनी बैठकीत केल्या.
