। लोकजागर । फलटण । दि. ०६ मार्च २०२५ ।
महाराष्ट्र राज्य मार्ग परिवहन महामंडळाकडे (एस. टी.) प्रलंबीत असलेल्या कामगारांच्या विविध स्वरुपातील थकबाकीच्या रक्कमा मिळाव्यात या मागणीसाठी फलटणला एस. टी. कामगार संघटनेकडून निदर्शने करण्यात आली. एस. टी. कर्मचार्यांना वारंवार मागणी करुनही ही थकबाकी मिळत नसल्याने कामगारांमध्ये तीव्र नाराजी निर्माण झाली असून फलटण आगार मुख्य प्रवेशद्वारात महाराष्ट्र एस. टी. कामगार संघटनेच्यावतीने आयोजित या निदर्शनात कामगार उत्स्फूर्तपणे सहभागी झाले होते.
आंदोलना दरम्यान दि. १ एप्रिल २०२० ते दि. ३१ मार्च २०२४ या कालावधीत देय होणारी थकबाकी त्वरित अदा करावी. सन २०१८ च्या महागाई भत्त्याची थकबाकी कामगारांना अदा करण्याबाबत न्यायालय आदेशाची त्वरित अंमलबजावणी करावी. सन २०१६ ते २०२० या कालावधीत महामंडळाने एकतर्फी जाहीर केलेल्या वेतनवाढ व घरभाडे वाढीचा दर ८, १६, २४ टक्के करुन सदर थकबाकी त्वरित अदा करावी. सन २०१६ ते २०२० या कालावधीत एकतर्फी जाहीर केलेल्या कामगारांच्या वार्षिक वेतनवाढीचा दर ३ टक्क्यांवरुन २ टक्के इतका केला होता तो ३ टक्के करुन राहिलेली थकबाकी त्वरित कामगारांना अदा करावी. शासकीय कर्मचाऱ्यांप्रमाणे एस.टी. कर्मचाऱ्यांना ५३ टक्के महागाई भत्ता थकबाकीसह देण्यात यावा, भविष्य निर्वाह निधीच्या खात्यातून कामगारांना मागणी नुसार त्वरित उचल देण्यात यावी. अन्यायकारक शिस्त व आवेदन पद्धत बंद करुन नवीन शिस्त व आवेदन पद्धत लागू करावी आदी प्रमुख मागण्या महाराष्ट्र एस. टी. कामगार संघटनेच्यावतीने यावेळी करण्यात आल्या.
आंदोलनात कामगार संघटनेचे अध्यक्ष पोपट सोनावले, सचिव योगेश भागवत, संघटक सचिव गणेश सावंत, खजिनदार निरप्पा वाघमोडे, विभागीय सदस्य सुरेश अडगळे, बाळासाहेब जगताप, सुजित जगताप, संघटनेचे ज्येष्ठ नेते सुरेश पन्हाळे, दत्तात्रय कोळेकर, दिपक बेलदार, विलास डांगे, प्रवीण बोबडे, गणेश ननवरे, महेश अनिल भोसले, सागर चांगण, निलेश बोधे, नितीन शिंदे वगैरे संघटनेचे पदाधिकारी व कर्मचारी सहभागी झाले होते.
