तीन दशकांची वैद्यकीय सेवा, पर्यावरण आणि साहित्य क्षेत्रातील योगदानाची दखल; दर्पणकार बाळशास्त्री जांभेकर पत्रकार संघाचा उपक्रम.
। लोकजागर वृत्त । फलटण । ५ सप्टेंबर २०२६ ।
फलटण येथे गेली तीस वर्षे पॅथॉलॉजिस्ट म्हणून कार्यरत असलेले महेश अच्युत बर्वे यांना वैद्यकीय क्षेत्रातील उल्लेखनीय कार्याची दखल घेत दर्पणकार बाळशास्त्री जांभेकर पत्रकार संस्था (संघ) यांच्या वतीने राष्ट्रीय दीपस्तंभ पुरस्कार जाहीर करण्यात आला आहे. शिक्षक दिनानिमित्त मंगळवार, दि. ०८ सप्टेंबर रोजी नाशिक येथे होणाऱ्या राष्ट्रीय ज्ञानभास्कर पुरस्कार सोहळ्यात त्यांना हा पुरस्कार प्रदान करण्यात येणार आहे. एम.बी.बी.एस., एम.डी. (पॅथॉलॉजी) शिक्षण घेतलेले महेश बर्वे गेल्या तीस वर्षांपासून फलटणसह ग्रामीण भागात प्रयोगशाळा वैद्यकशास्त्राच्या माध्यमातून सेवा देत आहेत. तालुका स्तरावर अत्याधुनिक तपासणी यंत्रसामग्रीच्या माध्यमातून अद्ययावत प्रयोगशाळा सेवा उपलब्ध करून देण्यासाठी त्यांनी काम केले आहे. महेश बर्वे यांचे प्राथमिक शिक्षण फलटणच्या मुधोजी प्राथमिक विद्यामंदिरमध्ये, तर माध्यमिक शिक्षण मुधोजी हायस्कूल व ज्युनिअर कॉलेजमध्ये झाले. त्यानंतर त्यांनी सोलापूर येथील वैशंपायन स्मृती वैद्यकीय महाविद्यालयातून वैद्यकीय शिक्षण पूर्ण केले.
वैद्यकीय सेवेबरोबरच वृक्षसंवर्धन आणि पर्यावरणविषयक उपक्रमांमध्ये त्यांचा मोठा सहभाग राहिला आहे. अच्युत दत्तात्रेय स्मृती हरित वसुंधरा उपक्रमाच्या माध्यमातून ‘लोकसंख्येएवढी वृक्षसंख्या’ हा ध्यास घेऊन त्यांनी वृक्षसंवर्धनासाठी प्रयत्न केले आहेत. जागतिक लोकसंख्या दिनानिमित्त दरवर्षी ११ जुलै रोजी फलटण परिसरात ‘हर घर झाड’ मोहीम राबविण्यात येते. ‘ज्योत से ज्योत मिलाते चलो’ या संकल्पनेतून वृक्षमित्रांचे संकलन करण्यासाठीही त्यांनी काम केले आहे. रोटरी क्लब फलटणच्या विविध समाजोपयोगी उपक्रमांमध्ये त्यांचा सहभाग राहिला असून, फलटण तालुक्यात टेनिस खेळाची परंपरा कायम ठेवण्यासाठीही ते सातत्याने प्रयत्नशील आहेत.
वैद्यकीय आणि सामाजिक कार्यासोबत त्यांनी लेखनाची आवडही जोपासली आहे. ‘एम. बी.’ या नावाने त्यांनी स्फुटलेखन केले असून ‘कोलांट्या’ आणि ‘निरगाठ’ ही त्यांची पुस्तके प्रकाशित झाली आहेत. ‘कौशिकेय’ या नावाने ‘मी चे मागणे’ हा काव्यसंग्रह, तर ‘सिॲटल’वारी’ हे प्रवासवर्णनही त्यांच्या नावावर आहे. फोटोग्राफी, आठवणींची साठवण, एकट्याने प्रवास करणे आणि गायन या त्यांच्या आवडी आहेत. यापूर्वी महाराष्ट्र शासनाचा ‘वनश्री’ पुरस्कार त्यांना दोन वेळा मिळाला आहे. याशिवाय अखिल ब्राह्मण मध्यवर्ती संस्था नाशिकचा ‘विशेष सन्मान’, व्ही. एम. मेडिकल कॉलेज सोलापूरचा ‘ऑक्सिजन ऑफ ८७’, पृथ्वीमोलाची फाउंडेशनचा ‘वनमित्र पुरस्कार’ आणि जायंट्स ग्रुपचा ‘सामाजिक भान पुरस्कार’ही त्यांना मिळाला आहे.
दर्पणकार बाळशास्त्री जांभेकर पत्रकार संस्था (संघ) आयोजित शिक्षक दिन २०२६ सन्मान सोहळ्यात विविध क्षेत्रांत उल्लेखनीय काम करणाऱ्या व्यक्तींना राष्ट्रीय पुरस्काराने सन्मानित करण्यात येणार आहे. संस्थेचे राष्ट्रीय अध्यक्ष महेंद्र देशपांडे यांनी महेश बर्वे यांच्या पुरस्काराची घोषणा केली असून मंगळवार, दि. ०८ सप्टेंबर रोजी दुपारी २.३० वाजता नाशिकमधील गंगापूर रोड परिसरातील आर.एच.आर.टी. कॉलेज येथे हा पुरस्कार वितरण सोहळा पार पडणार आहे.
