सुलेखा शिंदे यांचा समासेविका ते कादंबरीकार हा प्रवास संघर्षमय होता : रविंद्र बेडकिहाळ

स्व. सुलेखा शिंदे यांचा प्रथम पुण्यस्मरणदिन विविध उपक्रमांनी संपन्न

। लोकजागर । फलटण । दि. १४ मार्च २०२५ ।

‘‘सुलेखाताईंचं लिहणं आणि जाणं दोन्ही मनाला चटका लावणारं होत. त्यांनी लिहिलेले साहित्य अनुभव विश्वावर आधारीत होते. एक समाजसेविका ते कादंबरीकार हा त्यांचा प्रवास संघर्षमय होता. लेखकाचं घर पेलणारी ही आई साखरशाळेतील ऊसतोडणी मजुरांच्या मुलांची ही आई होती. घरच्या परिस्थितीमध्ये पोटातील भूक पोटातच ठेऊन लेखणीतून नवे साहित्य जन्माला घालणार्‍या सुलेखाताईंचा हा प्रवास म्हणजे आयुष्यभर सोसलेल्या कष्टाची गाथाच आहे’’, असे विचार महाराष्ट्र साहित्य परिषदेचे सातारा जिल्हा प्रतिनिधी तथा ज्येष्ठ पत्रकार रविंद्र बेडकिहाळ यांनी व्यक्त केले.

येथील प्रसिद्ध लेखक ‘सर्ज्या’कार सुरेश शिंदे यांच्या पत्नी तथा पत्रकार विकास शिंदे यांच्या मातोश्री, लेखिका कै. सुलेखा शिंदे यांच्या प्रथम पुण्यस्मरणदिनी पुस्तक प्रकाशन, पुरस्कार वितरण, किर्तन अशा विविध कार्यक्रमांचे आयोजन बुधवार, दिनांक 12 मार्च 2025 रोजी करण्यात आले होते. हे सर्व कार्यक्रम तांबमाळ (फलटण) येथील सुर्याजी गार्डन बँक्वेट हॉल येथे पार पडले. त्यावेळी ‘सुलेखा सुरेश शिंदे – समाजसेविका ते कादंबरीकार’ या पुस्तक प्रकाशनावेळी बेडकिहाळ बोलत होते. यावेळी व्यासपीठावर महाराष्ट्र साहित्य परिषद शाखा फलटणचे कार्याध्यक्ष महादेव गुंजवटे, साहित्यिक सुरेश शिंदे, ज्येष्ठ पत्रकार प्रा. रमेश आढाव, प्राचार्य शांताराम आवटे, माणदेशी साहित्यिक ताराचंद्र आवळे, बाळासाहेब ननावरे, बापूराव शिंदे, गोविंद भुजबळ, राजेंद्र बोराटे, सौ. अलका बेडकिहाळ, सुरेखा फुले, शशिकला नवले, रोहित वाकडे, राजेंद्र बोन्द्रे, जयवंत फुले, दादासाहेब कदम यांची प्रमुख उपस्थिती होती.

नेहमी साहित्यिकांना पुरस्कार दिले जातात मात्र या कार्यक्रमावेळी ‘सुलेखा सुरेश शिंदे साहित्य संवाद पुरस्कार’ खास वाचकांसाठी देण्यात आला. या आगळ्यावेगळ्या पुरस्काराचे मानकरी दिलीप जनार्दन पिसाळ व नसीम कादर पठाण यांना मान्यवरांचे हस्ते मानपात्र, शाल, पुस्तके व श्रीफळ देऊन मान्यवरांचे गौरविण्यात आले. नासिमा पठाण यांनी पुरस्काराबद्दल कृतज्ञतपर आपले मनोगत व्यक्त केले.

तत्पूर्वी युवा कीर्तनकार ह.भ.प. नवनाथ महाराज कोलवडकर यांचे सुश्राव्य कीर्तन झाले. त्यांनी आपल्या कीर्तनसेवेत सुलेखा शिंदे यांच्या साहित्यसेवेचा आढावा घेतला.

कार्यक्रमाचे सूत्रसंचालन माणदेशी साहित्यिक ताराचंद्र आवळे यांनी केले तर आभार विकास शिंदे यांनी मानले. यावेळी साहित्य, सामाजिक, शैक्षणिक, वृत्तपत्र, सहकार, राजकीय, कृषी अशा विविध क्षेत्रातील मान्यवर व रसिक उपस्थित होते.