शिक्षणाचा आणि आरोग्याचा संदेश देण्यासाठी फलटणमध्ये उद्या ‘रन फॉर एज्युकेशन’ मिनी मॅरेथॉन

एका केनियन खेळाडूसह तब्बल १ हजार स्पर्धकांची नोंदणी; मुधोजी क्लब येथून सकाळी ६:३० वाजता होणार प्रारंभ.

। लोकजागर । फलटण । २ जून २०२६ ।

फलटण एज्युकेशन सोसायटी संचलित अभियांत्रिकी महाविद्यालय, फलटणच्या वतीने समाजामध्ये शिक्षणाबाबत व्यापक जनजागृती निर्माण करण्यासाठी आणि नागरिकांना आरोग्यदायी जीवनशैलीचा संदेश देण्यासाठी ‘रन फॉर एज्युकेशन’ या महत्त्वपूर्ण घोषवाक्याखाली उद्या बुधवार, दिनांक ३ जून २०२६ रोजी भव्य मिनी मॅरेथॉन स्पर्धेचे आयोजन करण्यात आले आहे. या क्रीडा उपक्रमाला फलटणकरांचा अभूतपूर्व प्रतिसाद मिळाला असून, यामध्ये एका केनियन (Kenya) आंतरराष्ट्रीय स्पर्धकासह परिसरातील सुमारे १ हजार क्रीडाप्रेमींनी आपली नाव नोंदणी पूर्ण केली असल्याची माहिती महाविद्यालयाचे प्राचार्य डॉ. दळवी यांनी दिली.

या मिनी मॅरेथॉनचा शुभारंभ उद्या सकाळी ठीक ६:३० वाजता मुधोजी क्लब, महात्मा फुले चौक येथून होणार आहे. स्पर्धकांचा उत्साह आणि वयोगट लक्षात घेऊन या मॅरेथॉनसाठी ३ किलोमीटर आणि ५ किलोमीटर असे दोन स्वतंत्र आणि वैशिष्ट्यपूर्ण धावण्याचे मार्ग निश्चित करण्यात आले आहेत.

असा असेल ३ किलोमीटरचा मार्ग:
मुधोजी क्लब (महात्मा फुले चौक) येथून सुरुवात होऊन श्रीमंत मालोजीराजे पुतळा – तहसील कार्यालय कॉर्नर (बीएसएनएल कार्यालयाजवळ) – गिरवी नाका – डी. एड. चौक – उपळेकर महाराज मंदिर – महावीर स्तंभ चौक – उमाजी नाईक चौक – डेक्कन चौक आणि पुन्हा मुधोजी क्लब (महात्मा फुले चौक) येथे या मार्गाची सांगता होईल.

असा असेल ५ किलोमीटरचा मुख्य मार्ग:
मुधोजी क्लब (महात्मा फुले चौक) येथून प्रारंभ करून श्रीमंत मालोजीराजे पुतळा – तहसील कार्यालय कॉर्नर – मारवाड पेठ कॉर्नर – मुधोजी कॉलेज रोड बारस्कर चौक – शुक्रवार चौक (शुक्रवार पेठ गणपती मंडळ) – शंकर मार्केट – श्रीराम मंदिर – पाचबत्ती चौक – बारामती चौक – छ. शिवाजी महाराज चौक – डॉ. बाबासाहेब आंबेडकर चौक – पृथ्वी चौक – डी. एड. चौक – उपळेकर महाराज मंदिर – महावीर स्तंभ चौक – उमाजी नाईक चौक – डेक्कन चौक आणि शेवटी मुधोजी क्लब (महात्मा फुले चौक) असा हा मोठा फेरा असेल.

या स्तुत्य आणि आरोग्यदायी उपक्रमामध्ये फलटण शहर व तालुक्यातील विद्यार्थी, पालक, नागरिक, तरुण वर्ग, क्रीडाप्रेमी तसेच विविध सामाजिक संस्थांच्या प्रतिनिधींनी मोठ्या संख्येने उपस्थित राहून सहभागी व्हावे, असे आवाहन फलटण एज्युकेशन सोसायटीचे अध्यक्ष आ. श्रीमंत रामराजे नाईक निंबाळकर, सोसायटी नियामक मंडळाचे चेअरमन श्रीमंत रघुनाथराजे नाईक निंबाळकर आणि सेक्रेटरी श्रीमंत संजीवराजे नाईक निंबाळकर यांनी केले आहे.