सातारा जिल्ह्याच्या विकासासाठी सर्व यंत्रणा व लोकप्रतिनिधींनी समन्वयाने काम करावे; खासदार उदयनराजे भोसले यांचे प्रतिपादन!

जिल्हा विकास समन्वय व सनियंत्रण (दिशा) समितीची बैठक संपन्न; शिक्षण, आरोग्य व शेतकरी योजना प्रभावीपणे राबवण्याच्या अधिकाऱ्यांना सूचना.

। लोकजागर वृत्त । सातारा । १८ जुलै २०२६ ।

सातारा जिल्ह्याच्या सर्वांगीण आणि शाश्वत विकासासाठी जिल्ह्यातील सर्व शासकीय यंत्रणांनी आणि लोकप्रतिनिधींनी आपापसातील मतभेद बाजूला ठेवून अत्यंत समन्वयाने व एकत्रितपणे काम करावे, असे परखड प्रतिपादन खासदार उदयनराजे भोसले यांनी केले आहे. सातारा जिल्हा परिषदेच्या छत्रपती शिवाजी महाराज सभागृहात खासदार उदयनराजे भोसले यांच्या मुख्य अध्यक्षतेखाली जिल्हा विकास समन्वय व सनियंत्रण (दिशा) समितीची महत्त्वपूर्ण आढावा बैठक संपन्न झाली. या बैठकीत जिल्ह्यातील विविध विकासकामांचा आणि केंद्र सरकारच्या योजनांचा सखोल आढावा घेताना ते बोलत होते.

या उच्चस्तरीय बैठकीला जिल्हा परिषद अध्यक्षा प्रिया शिंदे, विधान परिषदेचे आमदार धैर्यशील कदम, जिल्हाधिकारी संतोष पाटील, मुख्य कार्यकारी अधिकारी याशनी नागराजन, पोलीस अधीक्षक निखिल पिंगळे, जिल्हा विकास समन्वय व संनियंत्रण यंत्रणेचे प्रकल्प संचालक विश्वास सिद्ध यांच्यासह समितीचे सर्व सन्माननीय सदस्य आणि विविध शासकीय विभागांचे वरिष्ठ अधिकारी प्रामुख्याने उपस्थित होते. बैठकीत मार्गदर्शन करताना खासदार भोसले म्हणाले की, दिशा समितीच्या सर्व सदस्यांनी केंद्र सरकारच्या योजनांच्या प्रत्यक्ष अंमलबजावणीविषयी आणि क्षेत्रीय अडचणींविषयी आपले म्हणणे लेखी स्वरूपात मांडावे. शासकीय अधिकाऱ्यांनी विशेषतः प्राथमिक शिक्षण आणि सार्वजनिक आरोग्य या दोन अत्यंत महत्त्वाच्या क्षेत्रांना सर्वोच्च प्राधान्य देऊन काम करणे गरजेचे आहे. ग्रामीण भागातील मुलांना आधुनिक संगणक शिक्षण मिळणे अत्यंत आवश्यक असून, यासाठी प्राथमिक शाळांमधील शिक्षकांना संगणक हाताळण्याचे अद्ययावत प्रशिक्षण देण्यात यावे, अशी सूचना त्यांनी केली.

सार्वजनिक आरोग्याचा आढावा घेताना त्यांनी जिल्हा रुग्णालय, उपजिल्हा रुग्णालय आणि ग्रामीण रुग्णालयांमध्ये उत्कृष्ट दर्जाची स्वच्छता राखण्याचे निर्देश दिले. प्रत्येक शासकीय रुग्णालयाला स्त्री प्रसूतीचे जे अधिकृत उद्दिष्ट देण्यात आले आहे, ते कोणत्याही परिस्थितीत पूर्ण झालेच पाहिजे, तसेच सर्व वैद्यकीय अधिकाऱ्यांनी आपले मुख्यालय सोडू नये आणि जनतेला चोवीस तास सेवा उपलब्ध करून द्यावी, असे त्यांनी बजावले. सातारा जिल्ह्यात अनेक राष्ट्रीय व आंतरराष्ट्रीय दर्जाचे गुणवंत खेळाडू आहेत. या खेळाडूंना आंतरराष्ट्रीय पातळीवरील आधुनिक सुविधा उपलब्ध करून देण्यासाठी कॉर्पोरेट सामाजिक जबाबदारी निधीचा (CSR फंड) प्रभावी वापर करावा. हा निधी मोठ्या प्रमाणात उपलब्ध होण्यासाठी दिशा समितीच्या सदस्यांसह सर्व अधिकाऱ्यांनी एकत्रित प्रयत्न करावेत, असे आवाहन त्यांनी केले. केंद्र सरकारच्या ज्या योजना थेट शेतकरी बांधवांशी संबंधित आहेत, त्या सर्व योजनांचा जास्तीत जास्त लाभ जिल्ह्यातील शेवटच्या शेतकऱ्यांपर्यंत पोहोचवला पाहिजे. ज्या प्रलंबित योजनांबाबत केंद्र सरकारकडे विशेष पाठपुरावा करण्याची गरज आहे, त्याची लेखी माहिती दिल्यास दिल्ली स्तरावर त्याचा योग्य आणि गतीने पाठपुरावा केला जाईल, अशी ग्वाही खासदार भोसले यांनी या बैठकीत दिली. या सर्वसमावेशक बैठकीत प्रधानमंत्री ग्रामसडक योजना, प्रधानमंत्री कृषी सिंचन योजना, राष्ट्रीय महामार्ग प्राधिकरणाची जिल्ह्यातील कामे, प्रधानमंत्री आवास योजना, जलजीवन मिशन आणि महावितरण कंपनीच्या विविध लोककल्याणकारी योजनांचा सविस्तर व प्रदीर्घ आढावा घेण्यात आला.