। लोकजागर । फलटण । दि. 11 ऑक्टोबर 2025 ।
सुजन फाउंडेशन या सेवाभावी संस्थेच्या वतीने दरवर्षी आयोजित करण्यात येणारे महाराष्ट्र कुस्ती संमेलन 2025 यंदा कापशी (ता. फलटण, जि. सातारा) येथे उत्साहात पार पडले. निरोगी, निकोप, निर्व्यसनी आणि आरोग्यसंपन्न युवा पिढी घडावी तसेच नव्या पिढीला मैदानी खेळाची आवड निर्माण व्हावी, या उद्देशाने हा उपक्रम राबविण्यात आला.
संमेलनाचे अध्यक्षस्थान नगरसेवक अजिनाथ राऊत (नगरपंचायत माढा) यांनी भूषवले. यावेळी कुस्तीगिरांच्या मातांचा आदर्श माता सन्मान’ आणि ज्येष्ठ नागरिकांचा विशेष सन्मान करण्यात आला.
कुस्ती क्षेत्रातील उल्लेखनीय कार्याबद्दल सुजन फाउंडेशनच्या वतीने राष्ट्रीय खलिफा पुरस्कार प्रदान करण्यात आला. यामध्ये वस्ताद वसंतराव पाटील (ठाणे), वस्ताद तानाजी घोरपडे (कोरेगाव), वस्ताद पांडुरंग शिंदे (इंदापूर), क्रीडा शिक्षक परशुराम लोंढे (सांगली), वस्ताद जाकीरभाई मणेर (फलटण) आणि वस्ताद रवींद्र काकडे (आदर्की) यांचा गौरव करण्यात आला.
संमेलनातील स्पर्धेत पैलवान राम मदने (आदर्की), नंदिनी बडे (बीड), नेहा मडके (सांगली), विराज निगुडे (अहिल्यानगर) आणि आदि गव्हाणे (जामखेड) यांनी मानाच्या पाच गदा पटकाविल्या. तसेच चाळीस मनांच्या ढाल कुस्तीगिरांनी संपादित केल्या. विजेत्यांना सन्मानपत्र, स्टीलचा ग्लास, मेडल आणि लंगोट देऊन गौरविण्यात आले.
या स्पर्धेत सातारा, सांगली, सोलापूर, पुणे, कोल्हापूर, ठाणे, अहिल्यानगर, बीड, उस्मानाबाद व धुळे जिल्ह्यातील 160 कुस्तीगिरांनी सहभाग घेतला. एकूण 81 कुस्ती सामने रंगले. पंच म्हणून पैलवान मनोहर आडके, प्रतापसिंह पवार, सावता करणे, रघुनाथ उगले, आप्पासो गव्हाणे आणि आयुब शेख यांनी जबाबदारी पार पाडली.
कार्यक्रमाच्या यशस्वी आयोजनासाठी सागर जमदाडे, सचिन पवार, पैलवान जयदीप गायकवाड, रामहरी वहील, सुभाष माने, सुनील वाळुंज, सचिन बनकर, संतोष सूर्यवंशी, त्रिंबक बोबडे, शेखर अडसूळ, प्रशांत शिंदे, प्रशांत अब्दागिरे, माने सर, झेंडे सर, दादा जाधव, पैलवान सुधीर पुंडेकर, इनुस पठाण, जावेद आतार, सुनीती धायगुडे, शबाना पठाण, शुभांगी डोके, मोहिनी भोंगळे यांनी परिश्रम घेतले.
कार्यक्रमाचे प्रास्ताविक संपतराव जाधव यांनी केले, सूत्रसंचालन ज.तु. गारडे यांनी केले तर आभार अजित जाधव यांनी मानले. आदर्की पंचक्रोशी व कापशी ग्रामस्थ तसेच कुस्तीप्रेमी मोठ्या संख्येने उपस्थित होते.
