धर्मवीर छत्रपती संभाजी महाराज साहित्य संमेलनानिमित्त भव्य निबंध स्पर्धा ! तिन्ही गटांसाठी विविध विषय, २५ जानेवारी अंतिम मुदत !

। लोकजागर । फलटण । दि. २८ नोव्हेंबर २०२५ ।

फलटण येथे होणाऱ्या धर्मवीर छत्रपती संभाजी महाराज राज्यस्तरीय मराठी साहित्य संमेलनाच्या (९ वे वर्ष) निमित्ताने भव्य निबंध लेखन स्पर्धा २०२६ चे आयोजन करण्यात आले आहे. या स्पर्धेत लहान गट (इ. ३ ते ७ वी), गट क्र. २ (इ. ८ वी ते १२ वी) आणि खुला गट (सर्वांसाठी) अशा तीन गटांचा समावेश आहे. साहित्यप्रेमी, विद्यार्थी आणि अभ्यासकांसाठी ही एक मोठी संधी आहे.

लहान गटासाठी ‘माझं आवडतं झाड’, ‘मला काय व्हायचंय’ आणि ‘धर्मवीर छत्रपती संभाजी महाराज, बालपण व शिक्षण’ हे विषय देण्यात आले आहेत. गट क्र. २ साठी ‘बदलत्या समाज रचनेत युवा पिढीचे योगदान’, ‘मोबाईल शाप कि वरदान’ आणि ‘धर्मवीर छत्रपती संभाजी महाराज यांची साहित्य रचना’ या विषयांवर निबंध लिहायचा आहे. तर खुल्या गटासाठी ‘आरक्षण समस्या कि वरदान’, ‘आधुनिक शेतीतील आव्हान व संधी’ आणि ‘अजिंक्य योद्धा, धर्मवीर छत्रपती संभाजी महाराज’ यांसारखे महत्त्वपूर्ण विषय ठेवण्यात आले आहेत.

या स्पर्धेसाठी काही महत्त्वाचे नियम निश्चित करण्यात आले आहेत. निबंध लेखकाने तो कागदाच्या एकाच पृष्ठभागावर सुवाच्च अक्षरात आणि स्वहस्ते लिहायला हवा. निबंधाचे संदर्भ पूर्ण झाल्यावर त्याचा उल्लेख करणे बंधनकारक आहे. स्पर्धकांनी आपला निबंध बंद लिफाफ्यात दि. २५ जानेवारी २०२६ पर्यंतच निबंध पाठवायचा आहे. या मुदतीनंतर आलेले निबंध स्वीकारले जाणार नाहीत.

स्पर्धेचा निकाल १ फेब्रुवारी २०२६ रोजी जाहीर केला जाईल. यशस्वी विजेत्यांना २७ फेब्रुवारी २०२६ रोजी संपन्न होणाऱ्या राज्यस्तरीय साहित्य संमेलनात बक्षीस वितरण केले जाईल. स्पर्धा प्रमुख प्रा. श्री. एम. एस. गुंजवटे यांनी या स्पर्धेत जास्तीत जास्त साहित्यप्रेमींनी सहभागी व्हावे, असे आवाहन केले आहे. निबंध ‘मातोश्री एंटरप्रायझेस, रिंग रोड, पृथ्वी चौक, फलटण’ या पत्त्यावर पाठवावा. संपर्क 9860754457/9657264800.