| लोकजागर | फलटण | दिनांक ४ डिसेंबर २०२५ |
आगामी फलटण हेरिटेज मॅरेथॉन (दिनांक 07 डिसेंबर 2025) साठी देशभरातून येणाऱ्या धावपटूंना स्वच्छ, ऐतिहासिक आणि आकर्षक फलटणचे दर्शन घडवण्याच्या उद्देशाने एक स्तुत्य उपक्रम हाती घेण्यात आला. फलटण रनर्स फाऊंडेशन आणि नेचर अँड वाईल्ड लाईफ वेल्फेअर सोसायटी, फलटण यांच्या संयुक्त विद्यमाने दिनांक 03 डिसेंबर 2025 रोजी सजाई गार्डन ते विंचूर्णी रोड या मॅरेथॉन मार्गावर प्लास्टिक कचरा निर्मूलनाची भव्य स्वच्छता मोहीम राबविण्यात आली.
या मोहिमेला ग्रामपंचायत जाधववाडी आणि मुधोजी कॉलेज, फलटण येथील प्राणीशास्त्र विभाग यांचा अत्यंत सक्रिय व प्रेरणादायी सहभाग लाभला. दोन्ही संस्थांनी मोठ्या उत्साहाने स्वयंसेवक, कर्मचारी आणि विद्यार्थ्यांना घेऊन या स्वच्छता चळवळीला बळ दिले. सकाळी 7 ते 10 या वेळेत संपन्न झालेल्या या उपक्रमात विद्यार्थी, युवक-युवती, विविध सामाजिक संस्थांचे प्रतिनिधी, नागरिक आणि पर्यावरणप्रेमी अशा शेकडो लोकांनी उत्स्फूर्त सहभाग नोंदवला.
या सामूहिक प्रयत्नातून रस्त्याच्या दुतर्फा असलेला प्लास्टिक कचरा मोठ्या प्रमाणात जमा करण्यात आला, ज्यामुळे संपूर्ण परिसर स्वच्छ आणि नीटनेटका होऊन पर्यावरणपूरक बनला. या उपक्रमामुळे केवळ मार्गाचे सौंदर्यवर्धन झाले नाही, तर ‘स्वच्छता हीच जबाबदारी’ हा महत्त्वपूर्ण संदेश नागरिकांच्या मनात दृढपणे रुजला. नागरिकांनीही अशा उपक्रमांचे सातत्य वाढावे, अशी अपेक्षा यावेळी व्यक्त केली.
आयोजक संस्थांनी या मोहिमेत सहभागी झालेल्या सर्व घटकांचे मनःपूर्वक आभार मानले. “फलटणला पर्यावरणपूरक, आरोग्यदायी व प्रेरणादायी शहर बनविण्यासाठी अशा संयुक्त उपक्रमांची नितांत गरज आहे,” असे मत आयोजकांनी व्यक्त केले. मॅरेथॉनपूर्वी राबवलेला हा उपक्रम फलटणची सकारात्मक आणि सुजाण प्रतिमा निश्चितच दर्शवणारा ठरला आहे.
