| लोकजागर | फलटण | दिनांक ४ डिसेंबर २०२५ |
माँ रुद्रात्मिका गुरुमाई यांच्या जीवनचरित्रावर आधारित असलेल्या ‘फकिरीयत’ या चित्रपटाचा शानदार उद्घाटन समारंभ फलटण येथे नुकताच संपन्न झाला. क्रियायोग मिशन फौंडेशनच्या संस्थापिका माँ रुद्रात्मिका गुरुमाई यांच्या हस्ते हा सोहळा पार पडला. यावेळी फलटण येथील साधकांच्या वतीने दिनांक 1 डिसेंबर 2025 रोजी गुरुमाई यांना ‘क्रियायोग भूषण’ पुरस्कार प्रदान करून त्यांचा गौरव करण्यात आला.
दिनांक 1 डिसेंबर 2025 रोजी सिटी प्राईड, फलटण येथील चित्रपटगृहात खुद्द माँ रुद्रात्मिका गुरुमाई उपस्थित होत्या. ज्यांच्या जीवनावर हा चित्रपट आधारित आहे, त्यांनी सर्व प्रेक्षकांसोबत हा ‘फकिरीयत’ चित्रपट पाहिला. चित्रपटगृहाची क्षमता 380 असतानाही, 460 हून अधिक प्रेक्षकांनी हा चित्रपट पाहण्यासाठी गर्दी केली. त्यामुळे अतिरिक्त खुर्च्यांची व्यवस्था करावी लागली. चित्रपट संपल्यानंतर गुरुमाई यांनी उपस्थित सर्व प्रेक्षकांना कृपाशीर्वाद आणि दर्शन दिले. या समारंभात फलटणतर्फे डॉ. गुळवणी सर व मॅडम, डॉ. माधव पोळ, डॉ. अलका पोळ, डॉ. प्रसाद जोशी, डॉ. किरणकुमार नाळे, डॉ. राजश्री नाळे, ला. मंगेश दोषी, ला. पूजा दोशी, श्री. कैलास साळुंके, श्री. राकेश हेंद्रे, श्री. बाबाजी काळे, तसेच बारामतीहून डॉ. सुजित अडसूळ व ॲड. योगेश वाघ आदी मान्यवरांनी गुरुमाईंचे स्वागत-सत्कार केले.
या कार्यक्रमानंतर माँ रुद्रात्मिका गुरुमाई यांनी पत्रकार परिषदेत दीड तास मार्गदर्शन केले. त्यांनी अनेकांच्या आध्यात्मिक प्रश्नांवर अत्यंत सुंदर भाष्य केले. अध्यात्म, क्रियायोग, ध्यान, पाखंड आणि तंत्र या संकल्पना स्पष्ट करत, क्रियायोग नेमका कसा करायचा आणि त्याचे जीवनातील फायदे काय आहेत, यावर त्यांनी सखोल माहिती दिली. विशेषतः तरुणांना त्यांनी तरुणपणीच आध्यात्मिक मार्गावर येण्यासाठी मार्गदर्शन करत आवाहन केले. गेल्या दहा वर्षांमध्ये प्राचीन योगीक पद्धत असलेल्या क्रियायोगाच्या बॅचेस त्या संपूर्ण महाराष्ट्रभर आणि काशीमध्ये घेत आहेत.
क्रियायोग हे अत्यंत प्राचीन असून, ते सर्वांगीण विकास करणारे ध्यान, प्राणायाम, मुद्रा यांचे संयोजन आणि प्राचीन आध्यात्मिक ज्ञान आहे. माँ गुरुमाई रुद्रात्मिका या उत्तराखंड येथील द्वारहाट, कुकुचिना येथील गुफा आश्रम संकुल आणि नाशिक येथील रुद्रधामच्या संस्थापक आहेत. जगभरातील क्रियायोग शिकू इच्छिणाऱ्या आणि ध्यान करू इच्छिणाऱ्या साधकांसाठी समकालीन आध्यात्मिक जागा निर्माण करणे हे क्रियायोग मिशन फाउंडेशनचे ध्येय आहे. या फाउंडेशनतर्फे क्रियायोगचे बेसिक आणि ॲडव्हान्स दीक्षा अभ्यासक्रम, कर्मक्षालन यज्ञ, ब्रह्मखोज शिबिर, हिमालयीन साधना ही शिबिरे नाममात्र शुल्कात आयोजित केली जातात.
