विविध धार्मिक कार्यक्रमांनी शनिवार पेठ आणि शनिनगर परिसर झाला भक्तीमय.
। लोकजागर । फलटण । १६ मे २०२६ ।
शनी जयंतीनिमित्त फलटण शहरातील शुक्रवार पेठ, शनिनगर येथील द. य. क्षीरसागर यांच्या खाजगी शनिमंदिरात अतिशय पवित्र आणि धार्मिक वातावरणात विविध कार्यक्रमांचे आयोजन करण्यात आले होते. शनी जयंतीचे औचित्य साधून मंदिर परिसरात केलेली आकर्षक फुलांची सजावट, भक्तीमय वातावरण आणि दिवसभर सुरू असलेल्या अभिषेक व पूजाविधींमुळे संपूर्ण मंदिर परिसर भक्तांच्या गर्दीने फुलून गेला होता. फलटण शहर व परिसरातील शेकडो भाविकांनी दिवसभरात येथे हजेरी लावून दर्शन घेतले.
या विशेष उत्सवाची सुरुवात पहाटे ५ वाजता शनिदेवांच्या मंगल स्नानाने व भव्य अभिषेकाने झाली. त्यानंतर सकाळी ६ ते दुपारी १२ या वेळेत भाविकांसाठी सामुदायिक अभिषेकाचे आयोजन करण्यात आले होते, ज्यामध्ये मोठ्या संख्येने सुवासिनी व भक्तांनी सहभागी होऊन पूजाअर्चा केली. दुपारी ठीक १२ वाजून ३० मिनिटांनी शनी जन्मोत्सव सोहळा अत्यंत उत्साहात पार पडला. जन्मोत्सवानंतर उपस्थित सर्व भाविकांसाठी महाप्रसादाचे वाटप करण्यात आले, ज्यामध्ये लापशी, जिलेबी, सुंठवडा आणि केळीचा प्रसाद भाविकांना देण्यात आला.
दुपारच्या सत्रातही भाविकांचा ओघ कायम होता, त्यामुळे दुपारी १ ते ३ वाजेपर्यंत पुन्हा एकदा भाविकांच्या मागणीनुसार सामुदायिक अभिषेकाचे आयोजन करण्यात आले. दिवसभर मंदिरामध्ये दर्शनासाठी आणि तेल अर्पण करण्यासाठी भक्तांच्या लांबच लांब रांगा पाहायला मिळाल्या. क्षीरसागर परिवाराच्या वतीने प्रतिवर्षीप्रमाणे यंदाही शनी जयंतीचे चोख नियोजन करण्यात आले होते, ज्यामुळे शनिवारच्या मुहूर्तावर आलेल्या या शनी जयंतीने संपूर्ण शुक्रवार पेठ भागात भक्तीचा पूर आला होता.
