कुलपती तथा राज्यपाल सी.पी.राधाकृष्णन यांचे हस्ते पदवी प्रदान समारंभ; ना. अजित पवार, ना. चंद्रकांत पाटील यांची उपस्थिती
। लोकजागर । सातारा । दि. १० फेब्रुवारी २०२५ ।
येथील कर्मवीर भाऊराव पाटील विद्यापीठ, सातारा या राज्य सार्वजनिक विद्यापीठाचा प्रथम दीक्षांत समारंभ बुधवार दिनांक १२ फेब्रुवारी २०२५ रोजी सकाळी ११ वाजता छत्रपती शिवाजी कॉलेज सातारा येथे आयोजित करण्यात आलेला आहे. हा समारंभ महाराष्ट्र राज्याचे राज्यपाल व कर्मवीर भाऊराव पाटील विद्यापीठाचे कुलपती सी.पी.राधाकृष्णन यांचे अध्यक्षतेखाली होत असून या समारंभास प्रमुख अतिथी म्हणून महाराष्ट्र राज्याचे उप मुख्यमंत्री व वित्त व नियोजन व राज्य उत्पादन शुल्क मंत्री नामदार अजित पवार व राज्याचे उच्च व तंत्रशिक्षण व संसदीय कामकाज मंत्री नामदार चंद्रकांत पाटील हे मान्यवर उपस्थित राहणार आहेत. अशी माहिती कर्मवीर भाऊराव पाटील विद्यापीठाचे कुलाधिकारी चंद्रकात दळवी यांनी दिली. ते कर्मवीर भाऊराव पाटील विद्यापीठाने छत्रपती शिवाजी कॉलेज सातारा येथे आयोजित केलेल्या पत्रकार परिषदेत बोलत होते. या वेळी विद्यापीठाचे कुलगुरू डॉ.ज्ञानदेव म्हस्के , रयत शिक्षण संस्थेचे सचिव विकास देशमुख, रयत शिक्षण संस्थेचे सहसचिव प्राचार्य डॉ.शिवलिंग मेनकुदळे, विभागाचे सहसचिव बी.एन. पवार, माध्यमिक विद्यापीठाचे प्र.कुलसचिव डॉ.विजय कुंभार व परीक्षा व मूल्यमापन मंडळाचे प्र.संचालक डॉ.हेमंत उमाप, जिल्हा माहिती अधिकारी वर्षा पाटोळे इत्यादी पदाधिकारी उपस्थित होते.
या समारंभास महाराष्ट्र शासनाचे विविध खात्यांचे मंत्री, विद्यापीठाचे माजी कुलगुरू,महत्वाचे शासकीय अधिकारी,विद्यापीठाच्या विविध समित्यांचे पदाधिकारी,सदस्य,रयतचे पदाधिकारी,मॅनेजिंग कौन्सिलचे सदस्य,जनरल बॉडी सदस्य,आजीव सदस्य ,आजीव सेवक ,विविध शाखांचे शाखा प्रमुख, पदवी घेणारे स्नातक , इत्यादी उपस्थित राहतील असे सांगण्यात आले.
