प्रगल्भ समाज निर्मितीसाठी साहित्यनिर्मिती करावी : रविंद्र बेडकिहाळ

फलटणला ८ वे धर्मवी छत्रपती संभाजी महाराज मराठी साहित्य संमेलन संपन्न

। लोकजागर । फलटण । दि. ०६ मार्च २०२५।

‘‘समाजातील अराजकता व वाईट प्रवृतीवर वास्तव लिखाण करुन लेखणीन वार करण्याचे काम साहित्यिकांनी केले पाहिजे. साहित्य निर्मिती केवळ पुरस्कारासाठी न करता प्रगल्भ समाज निर्मितीसाठी करावी’’, अशी अपेक्षा ८ व्या धर्मवीर छत्रपती संभाजी महाराज मराठी साहित्य संमेलनाच्या उद्घाटनाप्रसंगी महाराष्ट्र साहित्य परिषद, पुणेचे सातारा जिल्हा प्रतिनिधी रविंद्र बेडकिहाळ यांनी व्यक्त केली.

अ‍ॅग्रोन्युज परिवार चॅरिटेबल ट्रस्ट आयोजित 8 वे धर्मवीर छत्रपती संभाजी महाराज मराठी साहित्य संमेलन नवलबाई मंगल कार्यालय, फलटण येथे पार पडले. त्यावेळी संमेलन उद्घाटक रविद्र बेडकिहाळ बोलत होते. यावेळी ज्येष्ठ साहित्यिक जगनाथ शिंदे, संमेलनाध्यक्ष सौ. सोनाली ढमाळ, संमेलन स्वागताध्यक्ष श्रीमंत सुभद्राराजे नाईक निंबाळकर, प्राचार्य रविंद्र येवले, धैर्यशील देशमुख व सिताराम नरके, ‘अ‍ॅग्रोन्युज’ परिवाराचे प्रमुख तथा संमेलन संयोजक प्रकाश सस्ते आदी मान्यवर उपस्थित होते.

रविंद्र बेडकिहाळ पुढे म्हणाले, ‘‘फलटणच्या राजघराण्याने नेहमीच साहित्यीकांनाउच्च दर्जा दिला. ग्रामीण भागातून साहित्यिक तयार झाले पाहिजेत यासाठी सर्वोतोपरी मदत दिली. तीच परंपरा आजची पिढी जपत आहे. अँग्रोन्युज परिवाराचे काम नेहमीच समाजहिताचे चालले असून फलटण व पंचक्रोशीतील जाणकार खंबीरपणे त्यांच्या पाठिशी आहेत व भविष्यातही राहतील यात शंका नाही.’’

जगन्नाथ शिंदे म्हणाले, ‘‘धर्मवीर छत्रपती संभाजी महाराज हे महान लेखक, कवी होते. त्यांच्या साहित्यावर आजही फारसा प्रकाश टाकला जात नाही. खरेतर वयाच्या चौदाव्या वर्षी बुद्धभूषणम सारखी ग्रंथ निर्माती करून त्यांची समाजाप्रती असेलली तळमळ व समाजसुधारकता दिसुन येते’’, असे सांगून ‘‘फलटण येथे दरवर्षी होणारे धर्मवीर छत्रपती संभाजी महाराज राज्यस्तरीय मराठी साहित्य संमेलन महाराष्ट्राच्या साहित्य संस्कृतीचा मानबिंदू ठरेल’’ असे गौरवोद्गारही जगन्नाथ शिंदे यांनी काढले.

संमेलनाध्यक्ष सौ. सोनाली ढमाळ म्हणाल्या, ‘‘समाजसेवा हि बोलून होत नसते तर ती कार्यातून दिसावी लागते. साहित्यिक आपल्या लेखणीलाच शस्त्र बनवून समाजातील अनिष्ठ रुढी, परंपरा व अन्यायाला वाचा फोडतात.’’

यावेळी फलटण येथील प्रसिद्ध अस्थिरोग तज्ञ डॉ प्रसाद जोशी व डॉ. सौ. प्राची जोशी यांना ‘धर्मवीर संभाजी महाराज साहित्य सेवा
जीवनगौरव पुरस्कार’ व तिरकवाडी ता.फलटण येथील श्रीमती कांताबाई संपतराव कोकरे यांना ‘राष्ट्रमाता जिजाऊ आदर्श माता पुरस्कार’ प्रदान करण्यात आला तर महाराष्ट्र व गोवा येथून आलेल्या निवडक साहित्यिकांना ‘धर्मवर छत्रपती संभाजी महाराज विषेश साहित्य सेवा’, ‘उत्कृष्ट साहित्य सेवा पुरस्कार देवून गौरवण्यात आले.

पुरस्काराला उत्तर देताना, ‘‘छत्रपतींच्या आजोळी मिळणारा सन्मान आमच्या भावी जीवनाला नक्कीच दिशादर्शक ठरेल’’, असे सांगितले.

दुपारचे सत्रात धर्मवीर छत्रपती संभाजी महाराज चषक काव्य स्पर्धेचे आयोजन करण्यात आले होते. त्यामध्ये सातारा, नागपूर, गडचिरोली, मनमाड, पुणे, मुंबई, ठाणे, कोल्हापूर, सांगली, सोलापूर येथील कवींनी सहभाग नोंदवला. स्पर्धा परिक्षक म्हणून पुणे येथील प्रसिध्द कवी सिताराम नरके यांनी काम पाहिले तर अध्यक्षस्थानी श्रेष्ठ विचारवंत प्रा. रविंद्र येवले होते. पहिला चषक पटकावण्याचा मान फलटण येथील कवयित्री सौ. भारती खुटाळे यांना मिळाला. तर दुसरा व तिसरा चषक पुणे येथील कवींनी पटकावले.

प्रास्ताविक संमेलन संयोजक प्रकाश सस्ते यांनी केले तर आभार महादेव गुंजवटे यांनी मानले. सुत्रसंचालन प्रा. नितीन नाळे व
ज. तु. गार्डे यांनी केले.

संमेलनास साहित्यप्रेमी मोठ्या संख्येने उपस्थिती होते.