रवींद्र कर्वे यांना दिमाखात ‘उषःकाल सन्मान’ प्रदान; सेवा सहयोग फाउंडेशनच्या माध्यमातून ११०० हून अधिक विद्यार्थ्यांना ७ कोटींची मदत केल्याची माहिती.
। लोकजागर वृत्त । फलटण । ३० जून २०२६ ।
“कै. उषाताई दाणी यांनी आपल्या हयातीत केलेले शैक्षणिक आणि आध्यात्मिक कार्य संपूर्ण समाजाला नेहमीच नवी दिशा देणारे आहे,” असे उद्गार फलटण येथील प्रसिद्ध अस्थिरोग तज्ञ डॉक्टर प्रसाद जोशी यांनी व्यक्त केले. उषःकाल प्रतिष्ठान, फलटण यांच्या वतीने आयोजित करण्यात आलेल्या विशेष गुणगौरव व पुरस्कार वितरण सोहळ्यात ते अध्यक्षस्थानावरून बोलत होते. फलटण येथील नवलबाई मंगल कार्यालय येथे २८ जून रोजी आयोजित या भव्य आणि दिमाखदार सोहळ्यात ठाणे येथील ‘सेवा सहयोग फाउंडेशन विद्यार्थी विकास योजने’चे मुख्य प्रवर्तक रवींद्र कर्वे यांना सन्मानपूर्वक यंदाचा ‘उषःकाल सन्मान’ प्रदान करण्यात आला. मानचिन्ह आणि रोख रक्कम असे या अत्यंत प्रतिष्ठेच्या पुरस्काराचे स्वरूप होते. या सोहळ्यासाठी प्रमुख पाहुणे म्हणून पुणे येथील प्रसिद्ध ज्येष्ठ साहित्यिक सुनील देवधर उपस्थित होते.
कार्यक्रमाच्या प्रारंभी उषःकाल प्रतिष्ठानचे श्रीपाद विभुते यांनी उपस्थित सर्व सन्माननीय मान्यवरांचे पुष्पगुच्छ देऊन अत्यंत उत्साहात स्वागत केले. त्यांनी आपल्या प्रास्ताविक भाषणात प्रतिष्ठानच्या गौरवशाली वाटचालीचा आढावा घेतला आणि प्रतिष्ठान मार्फत समाजातील आदर्श, कर्मठ व्यक्तींना हा पुरस्कार देऊन त्यांच्या कार्याचा गौरव केला जातो, ज्यामुळे समाजाला एक आदर्श दिशा मिळते, असे सांगितले. या सोहळ्यात पुरस्कार स्वीकारल्यानंतर बोलताना सन्मानमूर्ती रवींद्र कर्वे यांनी आपल्या फाउंडेशनच्या अथांग कार्याची माहिती देताना सांगितले की, शासकीय सेवेतून सेवानिवृत्त झाल्यावर मी पूर्णवेळ सामाजिक कार्यास वाहून घेतले. समाजातील अत्यंत हुशार परंतु परिस्थितीने हालाखीच्या असलेल्या विद्यार्थ्यांना मुंबई, रायगड, ठाणे व परिसरातील व्यावसायिक शिक्षणासाठी आम्ही मदतीचा हात दिला असून, आतापर्यंत तब्बल ११८१ विद्यार्थ्यांना ७ कोटी रुपयांपेक्षा जास्त रकमेची थेट आर्थिक मदत फाउंडेशनच्या माध्यमातून करण्यात आली आहे.
या प्रसंगी बोलताना प्रमुख पाहुणे व ज्येष्ठ साहित्यिक सुनील देवधर यांनी उषःकाल प्रतिष्ठानच्या या सामाजिक व कौतुकास्पद कार्याचा गौरव केला, तसेच कैलासावासी उषाताई दाणी यांनी आपल्या निस्पृह कार्याने समाजावर एक कायमस्वरूपी वैचारिक ठसा उमटवला असल्याची आठवण करून दिली. या संपूर्ण सोहळ्याचे अत्यंत उत्कृष्ट व प्रवाही सूत्रसंचालन भाग्यश्री गोसावी यांनी केले, तर उपस्थित सर्वांचे मनःपूर्वक आभार सुभाष देशपांडे यांनी मानले. या ऐतिहासिक पुरस्कार सोहळ्याला अखिल ब्राह्मण संघटनेचे अध्यक्ष चंद्रशेखर दाणी, माजी प्राचार्य रवींद्र येवले, विक्रम आपटे, शांताराम आवटी, रविकांत फडतरे, संजय पालकर, संजय काशीकर यांच्यासह अखिल भारतीय विद्यार्थी परिषदेचे (अभाविप) पदाधिकारी, सदस्य आणि फलटणमधील नागरिक व निमंत्रित मोठ्या संख्येने उपस्थित होते.
