। लोकजागर । फलटण । दि. २० मार्च २०२५ ।
‘‘आजच्या धावपळीच्या युगात कामाचा ताण तणाव आणि बदललेली जीवनशैली यामुळे वेगवेगळे आजार निर्माण होत आहेत. वेगवेगळ्या औषधांचा उपयोग केल्याने शरीरावर विपरीत परिणाम होतात. त्यामुळे फिजिओथेरपी ही बिनाऔषधांची उपचारपद्धती शरीर स्वास्थ्यासाठी खूप प्रभावी आहे. त्यासोबत व्यायामाची जोड देणे आवश्यक आहे. डॉ.सौरभ शिंदे यांचे आसरा क्लिनिक उत्तम सेवा देऊन नागरिकांच्या पसंतीस उतरेल’’, असा विश्वास विधान परिषदेचे माजी सभापती आमदार श्रीमंत रामराजे नाईक निंबाळकर यांनी व्यक्त केला.
फलटण येथील एम्पायर टॉवर्स येथे डॉ.सौरभ शिंदे यांच्या आसरा या अत्याधुनिक मशिनरी व सर्व सोयी सुविधांनीयुक्त असलेल्या फिजिओथेरपी क्लिनिकचे उद्घाटन आमदार श्रीमंत रामराजे नाईक निंबाळकर यांच्या हस्ते झाले. त्यावेळी ते बोलत होते. यावेळी माजी आमदार दीपक चव्हाण, माजी नगरसेवक श्रीमंत अनिकेतराजे नाईक निंबाळकर, फलटण एज्युकेशन सोसायटीचे व्हाईस चेअरमन रमणलाल दोशी, ज्येष्ठ पत्रकार अरविंद मेहता यांची प्रमुख उपस्थिती होती.
‘‘फिजिओथेरपी ही काळाची गरज बनली आहे.ती आयुष्याच्या सर्व टप्प्यांवर लोकांना दुखापतीतून बरे होण्यासाठी उपयुक्त ठरते. सांध्यांची आणि स्नायूंची कार्यक्षमता वाढवण्यास मदत करते. डॉ.सौरभ शिंदे यांनी गुजरात व राजस्थान येथे पदवी शिक्षण घेऊन तेथील अत्याधुनिक पध्दतीचा अभ्यास आणि अनुभव घेतला असून त्यात त्यांचा चांगला हातखंडा आहे. त्याच पध्दतीच्या अत्याधुनिक इलेक्ट्रिक उपकरणांचा आणि म्यॅनुअल थेरपी यांच्या मदतीने उत्तम सेवा देण्याचा त्यांचा प्रयत्न आहे. त्यामुळे त्यांचे हे क्लिनिक नक्कीच नागरिकांच्या पसंतीस उतरेल’’, असा विश्वास माजी आमदार दीपक चव्हाण यांनी व्यक्त केला.
प्रारंभी उपस्थित मान्यवरांचे स्वागत डॉ.सौरभ शिंदे आणि रामचंद्र शिंदे यांनी केले. सूत्रसंचालन गजानन शिंदे यांनी केले. रामचंद्र शिंदे यांनी आभार मानले.
यावेळी डॉ. पार्श्‍वनाथ राजवैद्य (गुंगा), डॉ. एस.एम. भोकरे, डॉ.संदीप नाळे, डॉ. अभय कांबळे, डॉ.सौ.माने, सौ.वसुंधरा नाईक निंबाळकर, मुधोजी प्राथमिक विद्यामंदिरच्या चेअरमन सौ. नूतन शिंदे, व्हॉईस चेअरमन श्रीमती निर्मला रणवरे, प्राथमिक शिक्षक सहकारी बँकेच्या चेअरमन सौ. उषा मुळीक, कुरवली खुर्दचे सरपंच राहूल तोडकर, सावंतवाडीचे सरपंच प्रदीप सावंत, पत्रकार अशोक सस्ते, विजय भिसे, विविध गावचे सरपंच, उपसरपंच, सोसायटीचे चेअरमन व ग्रामस्थ आणि तालुक्यातील शिक्षक वृंद यांची उपस्थिती होती.
