विद्यार्थ्यांच्या सर्वांगीण विकासासाठी संस्था कटिबद्ध; संस्थेचे कार्यवाह रवींद्र बेडकिहाळ यांचे प्रतिपादन
। लोकजागर वृत्तसेवा । फलटण । १६ जून २०२६ ।
स्थानिक आचार्य बाळशास्त्री जांभेकर हायस्कूल येथे नव्याने प्रवेश घेतलेल्या विद्यार्थ्यांचा स्वागत समारंभ अत्यंत उत्साहपूर्ण आणि आनंदमयी वातावरणात पार पडला. विद्यार्थ्यांच्या नवीन शैक्षणिक प्रवासाची सुरुवात सकारात्मक व प्रेरणादायी व्हावी, या उद्देशाने आयोजित करण्यात आलेल्या या कार्यक्रमाला शिक्षण क्षेत्रातील विविध मान्यवरांची प्रमुख उपस्थिती लाभली होती. याप्रसंगी संस्थेचे कार्यवाह मा. श्री. रवींद्र बेडकिहाळ, शालेय समितीच्या चेअरमन सौ. अलका बेडकिहाळ, प्रशासन अधिकारी श्री. भिवा जगताप, श्रीराम विद्याभवनचे मुख्याध्यापक श्री. मनीष निंबाळकर तसेच आचार्य बाळशास्त्री जांभेकर हायस्कूलचे मुख्याध्यापक श्री. अरुण खरात प्रामुख्याने उपस्थित होते. कार्यक्रमादरम्यान विद्यालयात पहिले पाऊल टाकणाऱ्या सर्व नवागत विद्यार्थ्यांचे गुलाबपुष्प देऊन आणि पुढील वाटचालीस शुभेच्छा देऊन अत्यंत आपुलकीने स्वागत करण्यात आले, ज्यामुळे विद्यार्थ्यांमध्ये आनंदाचे वातावरण निर्माण झाले.
या सोहळ्यात उपस्थितांना मार्गदर्शन करताना मान्यवरांनी विद्यार्थ्यांना शालेय जीवनात शिस्त, कठोर परिश्रम आणि गुणवत्तापूर्ण शिक्षणाच्या माध्यमातून यश संपादन करण्याचे बहुमोल मार्गदर्शन केले. तसेच केवळ अभ्यासापुरते मर्यादित न राहता शाळेत वर्षभर आयोजित होणाऱ्या विविध शैक्षणिक, सांस्कृतिक आणि क्रीडा उपक्रमांमध्ये विद्यार्थ्यांनी सक्रिय सहभाग घ्यावा, असे आवाहनही यावेळी करण्यात आले. संस्थेचे कार्यवाह रवींद्र बेडकिहाळ यांनी आपल्या मार्गदर्शनात, विद्यार्थ्यांच्या सर्वांगीण विकासासाठी आणि त्यांना सर्व सोयी-सुविधा उपलब्ध करून देण्यासाठी संस्था नेहमीच कटिबद्ध राहील, अशी ग्वाही देत सर्व विद्यार्थ्यांच्या उज्ज्वल भवितव्यासाठी मनःपूर्वक शुभेच्छा दिल्या.
कार्यक्रमाच्या सुरुवातीला मुख्याध्यापक अरुण खरात सर यांनी सर्व पाहुण्यांचे स्वागत केले आणि विद्यार्थ्यांना शाळेच्या शिस्तीची तसेच वर्षभरात राबवल्या जाणाऱ्या विविध नाविन्यपूर्ण उपक्रमांची सविस्तर माहिती दिली. या आनंददायी स्वागत समारंभास विद्यालयातील सर्व शिक्षक, शिक्षकेत्तर कर्मचारी, पालक आणि विद्यार्थी मोठ्या संख्येने उपस्थित होते. नव्याने प्रवेशित झालेल्या चिमुकल्यांच्या चेहऱ्यावरील आनंद आणि पालकांचा मिळालेला मोठा पाठिंबा यामुळे हा सोहळा अत्यंत यशस्वीरीत्या संपन्न झाला.
