स्वयंसिद्धा महिला कल्चरल ग्रुपचा उपक्रम; खाद्यपदार्थ व गृहोपयोगी वस्तूंच्या विक्री प्रदर्शनाचेही खास आयोजन
। लोकजागर वृत्त । फलटण । १४ ऑक्टोबर २०२६ ।
नवरात्रोत्सवानिमित्त फलटणकरांसाठी स्वयंसिद्धा महिला कल्चरल ग्रुप फलटण यांच्या वतीने भव्य दांडिया रास कार्यक्रमाचे धुमधडाक्यात आयोजन करण्यात आले आहे. शुक्रवार, १६ ऑक्टोबर २०२६ रोजी सायंकाळी ६ वाजता महाराजा मंगल कार्यालय, फलटण येथे हा भव्य कार्यक्रम रंगणार आहे. या कार्यक्रमाच्या माध्यमातून नवरात्रोत्सवाचा आनंद, पारंपरिक संस्कृती आणि महिला सक्षमीकरणाचा संदेश देण्याचा प्रयत्न करण्यात आला असून दांडिया रासच्या माध्यमातून नागरिकांना उत्सवाचा भरभरून आनंद लुटण्याची मोठी संधी मिळणार आहे.
या कार्यक्रमाचे विशेष आकर्षण म्हणजे सहभागी दांडिया ग्रुपसाठी भव्य बक्षिसे ठेवण्यात आली आहेत. यासोबतच खाद्यपदार्थ व गृहोपयोगी वस्तूंचे भव्य विक्री व प्रदर्शन आयोजित करण्यात आले आहे, ज्यामुळे स्थानिक व्यावसायिकांना आपल्या वस्तू व उत्पादनांचे प्रदर्शन करण्याची आणि विक्रीची उत्तम संधी उपलब्ध होणार आहे. या दांडिया रास कार्यक्रमात फलटण व परिसरातील नागरिकांनी, महिला भगिनींनी तसेच दांडिया ग्रुपनी मोठ्या संख्येने सहभागी व्हावे, असे आवाहन स्वयंसिद्धा कल्चरल ग्रुपच्या अध्यक्षा मधुबाला भोसले यांनी केले आहे.
