। लोकजागर । फलटण । दि. 11 ऑक्टोबर 2025 ।
फलटण नगरपरिषदेच्या प्रसिद्ध झालेल्या प्रारूप मतदार यादीवर हरकत दाखल करताना नागरिकांनी आपल्या अर्जासोबत स्थळ पाहणीसाठी सक्षम रहिवासी पुरावा जोडणे अत्यावश्यक आहे, असे आवाहन नगरपरिषदेचे मुख्याधिकारी तथा प्रशासक निखिल जाधव यांनी एका प्रसिद्धीपत्रकाद्वारे केले आहे.
नगरपरिषदेच्या निवडणुकीसाठीची प्रारूप मतदार यादी नुकतीच प्रसिद्ध झाली असून, त्यावर हरकती व सूचना दाखल करण्याची प्रक्रिया सध्या सुरू आहे. दाखल झालेल्या हरकतींची स्थळ पाहणी नगरपालिका प्रशासनामार्फत करण्यात येणार आहे. या पाहणीसाठी रहिवासी पुरावा आवश्यक असल्याने नागरिकांनी हरकतीसोबत तो अनिवार्यपणे जोडावा, असे मुख्याधिकारी जाधव यांनी सांगितले.
नगरपालिकेकडून फक्त पुराव्यासह दाखल झालेल्या हरकतींवरच पुढील कार्यवाही केली जाणार असल्याचेही त्यांनी स्पष्ट केले.
दरम्यान, मतदार यादीवर हरकत दाखल करण्याची अंतिम मुदत सोमवार, दि. 13 ऑक्टोबर असून, नागरिकांनी ही मुदत लक्षात ठेवून आपले अर्ज वेळेत दाखल करावेत, असेही आवाहन प्रशासनाने केले आहे.
