। लोकजागर । फलटण । दि. 22 ऑक्टोबर 2025 ।
विद्यार्थ्यांच्या सर्वांगीण विकासासाठी जिल्हा परिषदेच्या शाळांमध्ये सातारा जिल्हा परिषदेमार्फत शालेय पोषण आहार अंतर्गत विविध उपक्रम राबवले जातात. त्यापैकी ‘शालेय पोषण आहार परसबाग’ हा एक महत्त्वाचा उपक्रम आहे. शैक्षणिक वर्ष २०२५-२६ मध्ये जिल्हा परिषद प्राथमिक शाळा फडतरवाडी यांनी या परसबाग स्पर्धेत सहभाग नोंदवून फलटण पंचायत समिती अंतर्गत तालुक्यात प्रथम क्रमांक मिळवला.
मुख्याध्यापक एम. डी. गायकवाड यांच्या मार्गदर्शनाखाली शिक्षक व विद्यार्थ्यांनी श्रमदान करून सुंदर परसबाग उभी केली आहे. या परसबागेतील भाजीपाल्याचा वापर शालेय पोषण आहारात नियमित केला जातो.
परसबागेत फळभाज्या, पालेभाज्या, फळे आणि औषधी वनस्पतींचे विविध विभाग तयार करण्यात आले आहेत. पोषणदृष्ट्या उपयुक्त भाज्यांचा अधिकाधिक समावेश करून विद्यार्थ्यांमध्ये आरोग्य आणि पर्यावरणप्रेमाची जाणीव निर्माण करण्याचा उद्देश साधला आहे.
या यशामागे शिक्षक छाया जाधव, संजय जगदाळे, जयश्री चव्हाण, रोहन दळवे, आशा वाघमारे, निकिता फडतरे तसेच इयत्ता सहावी आणि सातवीतील सर्व विद्यार्थ्यांचे श्रम आणि योगदान महत्वाचे ठरले.
फडतरवाडी ग्रामपंचायतीच्या सरपंच पौर्णिमा काटे, उपसरपंच अमोल फडतरे, अनुराज नलवडे तसेच शाळा व्यवस्थापन समितीचे अध्यक्ष दीपक दिवसे, उपाध्यक्षा सुजाता कर्वे आणि सदस्य यांच्या सहकार्यामुळे शाळेची परसबाग आदर्श ठरली आहे.
या कामगिरीबद्दल पंचायत समितीचे गटशिक्षणाधिकारी, शिक्षण विस्तार अधिकारी, केंद्रप्रमुख आणि शिक्षण विभागातील अधिकारी यांनी शाळेचे अभिनंदन केले. फडतरवाडी शाळेच्या या उपक्रमाने संपूर्ण तालुक्यात आदर्श निर्माण केला आहे.
