। लोकजागर । मर्ढे, ता. ३ डिसेंबर २०२५ ।
युगप्रवर्तक कवी बा. सी. मर्ढेकर यांच्या जयंतीनिमित्त महाराष्ट्र साहित्य परिषद (मसाप), शाखा शाहूपुरी, सातारा यांच्या वतीने मर्ढे येथील त्यांच्या निवासस्थानी नुकताच उत्साहात कार्यक्रम पार पडला. या कार्यक्रमात बोलताना युवा लेखक कवी निलेश महिगावकर यांनी महत्त्वाचे मत मांडले. ते म्हणाले की, मर्ढेकरांची कविता विश्वात्मक पसायदान मागणारी होती. दोन महायुद्धांचा प्रभाव असूनही, दुर्बोधतेचा शिक्का बसूनही त्यांची कविता आजही काळाच्या कसोटीवर टिकून आहे, कारण ती अभिजात आहे.
कार्यक्रमाचे अध्यक्षस्थान उद्योजक शामराव मर्ढेकर यांनी भूषवले होते, तर महाराष्ट्र साहित्य परिषद शाखा शाहूपुरी, साताराचे अध्यक्ष नंदकुमार सावंत आणि ९९ व्या अखिल मराठी भारतीय साहित्य संमेलनाचे कार्याध्यक्ष विनोद कुलकर्णी यांची प्रमुख उपस्थिती होती. नूतनीकरण केलेल्या बा. सी. मर्ढेकरांच्या निवासस्थानी हा सोहळा १ डिसेंबर रोजी संपन्न झाला.
यावेळी प्रास्ताविक करताना कार्याध्यक्ष श्री. विनोद कुलकर्णी म्हणाले की, काही वर्षांपूर्वी दुर्लक्षित असलेले बा. सी. मर्ढेकरांचे राहते घर मसाप शाहूपुरीच्या पुढाकाराने मूळ ढाचा न बदलता सुंदर करण्यात आले आहे. आज राज्यभरातून लोक आवर्जून इथे भेट देत आहेत. तसेच, बा. सी. यांच्या चरित्रलेखनाचे काम अंतिम टप्प्यात आले असून, त्यातून त्यांच्या अपरिचित साहित्यावर प्रकाश पडणार आहे.
प्रमुख अतिथी निलेश महिगावकर यांनी मर्ढेकरांच्या बोलीभाषेच्या योगदानाचे कौतुक केले. त्यांच्या नाटकांवर आणि कादंबरीवर सातारी भाषेची छाप आहे. आज सातारी भाषेला बोलीचा दर्जा नाही, हे कटू वास्तव आहे आणि यावर अभ्यासपूर्वक काम करावे लागेल, असे मत त्यांनी व्यक्त केले. अध्यक्षीय समारोपात शामराव मर्ढेकर यांनी मसापच्या उपक्रमांना सर्वतोपरी प्रोत्साहन आणि पाठींबा देण्याचे सूतोवाच केले. कार्यक्रमाचे सूत्रसंचालन सौ. सविता कारंजकर यांनी केले, तर नंदकुमार सावंत यांनी उपस्थितांचे आभार मानले.
कार्यक्रमास म.सा.प.पदाधिकारी संजय माने, सचिन सावंत, वजीर नदाफ, अमर बेंद्रे, आर. डी. पाटील, लेखिका ऐश्वर्या भोसले, श्री. कारंजकर, तुषार महामुलकर, साईराज भोसले, सतीश घोरपडे आणि मर्ढेकर ग्रामस्थांची उपस्थिती होती.
