। लोकजागर । सातारा ।
अश्वमेध ग्रंथालय व वाचनालयाच्या वतीने देण्यात येणाऱ्या श्रीमंत छत्रपती प्रतापसिंह महाराज (थोरले) स्मृतीप्रित्यर्थ ग्रंथालय पुरस्कारांचे वितरण कृष्णाखोरे विकास मंडळाचे माजी उपाध्यक्ष व माजी आमदार आनंदराव पाटील यांचे हस्ते रविवार, दिनांक १९ जानेवारी २०२५ रोजी सायं. ६ वाजता कै. भाऊसाहेब सोमण सभागृह, राजवाडा, सातारा येथे होणार असल्याची माहीती अश्वमेध ग्रंथालय व वाचनालयाचे संस्थापक, सातारा नगरपरिषदेचे माजी सभापती रविंद्र भारती यांनी दिली. पुरस्काराचे हे आठवे वर्षे आहे.
आजच्या व्हॉटस्अॅप आणि फेसबुकच्या काळात युवक वाचनापासून दूर जात आहेत. अशा काळात वाचन संस्कृती टिकवण्याचे काम खऱ्याअर्थाने ग्रंथालये व वाचनालये करीत असतात. दरवर्षी अनेक लेखक विविध विषयांवर पुस्तके लिहीत असतात, प्रकाशित करीत असतात. अशी पुस्तके वाचकांपर्यंत पोचवण्याचे काम ग्रंथालये करीत असतात. या ग्रंथालयांना तसेच वाचन संस्कृती टिकवणाच्या चळवळीमध्ये परिश्रम घेणाऱ्या सहकार्यांना प्रोत्साहन मिळावे, म्हणून अश्वमेध ग्रंथालयाच्या वतीने साहित्य क्षेत्रासाठी भरीव कार्य करणाऱ्या व्यक्तींना, संस्थांना श्रीमंत छ. प्रतापसिंह महाराज (थोरले) यांचे नावे दरवर्षी उत्कृष्ट ग्रंथालय, उत्कृष्ट ग्रंथालय कार्यकर्ता, उत्कृष्ट ग्रंथालय कर्मचारी तसेच उत्कृष्ट ग्रंथ वाचक पुरस्कार देवून गौरविण्यात येते. या वर्षीचा उत्कृष्ट ग्रंथ वाचक पुरस्कार शिवाजी विद्यापीठाचे माजी प्र-कुलगुरु प्राचार्य डॉ. अशोकराव भोईटे यांना, उत्कृष्ट ग्रंथालय पुरस्कार माण तालुक्यातील गोंदवले येथील संत ज्ञानेश्वर वाचनालय व ग्रंथालय यांना, उत्कृष्ट ग्रंथालय कार्यकर्ता पुरस्कार खंडाळा तालुक्यातील मोर्वे येथील गुरुकृपा वाचनालय व क्रीडा मंडळचे अध्यक्ष रविंद्र गुलाबराव ठोंबरे यांना तर उत्कृष्ट ग्रंथालय कर्मचारी पुरस्कार खटाव तालुक्यातील म्हासुर्णे येथील सरस्वती वाचनालयाच्या ग्रंथपाल सौ. जयश्री बाळकृष्ण इनामदार यांना देवून गौरविण्यात येणार आहे. तरी या कार्यक्रमास सर्वांनी उपस्थित रहावे, असे अवाहन ग्रंथालयाचे अध्यक्ष, ज्येष्ठ साहित्यिक डॉ. राजेंद्र माने व कार्यवाह शशीभूषण जाधव यांनी केले आहे.
