साताऱ्यात मुलाखतकर्त्यांची रंगली मुलाखत

सुधीर गाडगीळ यांची मुलाखत घेताना स्नेहल दामले व घनश्याम पाटील.

निवेदक सुधीर गाडगीळ यांचा पंच्याहत्तरीनिमित्त सत्कार ; मराठी भाषा पंधरावड्याचा  समारोप

। लोकजागर । सातारा । दि. १८ मार्च २०२५ ।

साताऱ्यातील शाहू कलामंदिरमध्ये तब्बल ७२०० जणांच्या मुलाखती घेऊन त्यांना बोलते करणारे नामवंत निवेदक सुधीर गाडगीळ यांचीच मुलाखत घेतली गेली. यात त्यांनी विविध मान्यवरांविषयीच्या आठवणींचा पाट उलघडला. दादा कोंडके, बाळासाहेब ठाकरे, माजी राष्ट्रपती अब्दुल कलाम आणि अन्य मंडळींचे किस्से सांगत सातारकरांपुढे आठवणींचा पेटारा खुला केला.

सातारा नगरपालिका व महाराष्ट्र साहित्य परिषदेच्या शाहूपुरी शाखेच्या वतीने आयोजित मराठी भाषा पंधरावड्याचा समारोप नामवंत निवेदक सुधीर गाडगीळ यांची मुलाखत आणि त्यांचा पंच्याहत्तरीच्या निमित्त सातारकरांच्यावतीने सत्काराने झाला. त्यांची मुलाखतकार स्नेहल दामले व घनश्याम पाटील यांनी घेतली. याप्रसंगी महाराष्ट्र साहित्य परिषद पुणेचे कोषाध्यक्ष विनोद कुलकर्णी, माजी उपनगराध्यक्ष अमोल मोहिते, मसाप, शाहूपुरी शाखेचे अध्यक्ष नंदकुमार सावंत, किशोर बेडकीहाळ, कार्याध्यक्ष चंद्रकांत बेबले, प्रमुख कार्यवाह अजित साळुंखे, कार्यवाह संजय माने, कोषाध्यक्ष सचिन सावंत उपस्थित होते.

यावेळी सुधीर गाडगीळ यांनी मुलाखत क्षेत्रातील त्यांचा झालेला प्रवेश, आलेले अनुभव, यासाठी लागणारे चिकाटी,मेहनत याविषयी सांगितले. मुलाखतीपूर्व संबंधित व्यक्तीचा मित्रपरिवार,  शेजारी यांच्याबरोबर चर्चा करून त्या व्यक्तीचा अभ्यास, त्यांच्या आवडीनिवडी सामाजिक प्रतिष्ठेची जाणीव, हजरजबाबीपणाचे महत्त्व स्पष्ट केले. सूत्रसंचालन व निवेदन क्षेत्रात शब्दांची सोपी मांडणी, साधेपणा, पुस्तक वाचन, वक्तशीरपणा या गोष्टीलाही महत्त्व असल्याचे त्यांनी सांगितले. मराठी चित्रपटसृष्टीतील ज्येष्ठ अभिनेते दादा कोंडके असे एकमेव व्यक्ती आहेत की त्यांनी माझी फिरकी घेतली होती. बाळासाहेब ठाकरे यांनी मला फ्लॅट देऊ केला होता परंतु मी तो नम्रपणे नाकारला. या गोष्टींचे बाळासाहेब ठाकरे यांना खूप अप्रूफ वाटले. त्यांनी मला मिठीत घेऊन मला दाद देत पुढील वाटचालीसाठी शुभेच्छा दिल्या.  माजी राष्ट्रपती अब्दुल कलाम यांनी प्रोटोकॉल बाजूला ठेवून मला जवळ घेऊन खूप गप्पा मारल्या असल्याचे त्यांनी सांगितले. याप्रसंगी पंडित भीमसेन जोशी, शरद पवार, आशा भोसले, माधुरी दीक्षित आणि विविध मान्यवरांच्या मुलाखतीबाबतचे किस्से सांगितले.

प्रास्ताविकात विनोद कुलकर्णी यांनी मराठी भाषा पंधरावडा गेले १४ वर्षे अखंडपणे सुरू आहे. यात सातारा नगरपालिकेचे मोठे योगदान आहे. सातारा नगरपालिका देशातील एकमेव नगरपालिका आहे जी मराठी भाषेच्या संवर्धनासाठी काम करते. यावर्षी घेतलेल्या अभिवाचन आणि काव्यवाचन स्पर्धेला चांगला प्रतिसाद मिळाला. साताऱ्यात अखिल भारतीय मराठी साहित्य संमेलन व्हावे अशी मागणी आम्ही केली असून याबाबत बांधकाम मंत्री शिवेंद्रसिंहराजे भोसले यांनीही पत्र दिले असल्याचे सांगितले.

कार्यक्रमाच्या सुरुवातीला नामवंत निवेदक सुधीर गाडगीळ यांच्या हस्ते अभिवाचन व काव्यवाचन स्पर्धेच्या विजेत्यांना बक्षीस देण्यात आले. सूत्रसंचालन ॲड.चंद्रकांत बेबले  यांनी केले तर आभार नंदकुमार सावंत यांनी मानले. यावेळी डॉ. संदीप श्रोत्री, डॉ.राजेंद्र माने, वजीर नदाफ, आर.डी.पाटील, डॉ.उमेश करंबेळकर, अमर बेंद्रे, सौ.ज्योती कुलकर्णी, सौ.अश्विनी जठार आणि साहित्यप्रेमी,सातारकर उपस्थित होते.

पंच्याहत्तरीच्या निमित्ताने कंदी पेढ्यांचा हार

पंच्याहत्तरीच्या निमित्ताने महाराष्ट्र साहित्य परिषद, शाहूपुरी शाखेच्या वतीने निवेदक सुधीर गाडगीळ यांचा सातारकरांच्यावतीने  नागरी सत्कार करण्यात आला. यावेळी मसाप, पुणे कोषाध्यक्ष विनोद कुलकर्णी, माजी उपनगराध्यक्ष अमोल मोहिते यांच्या हस्ते कंदीपेढ्याचा हार घालून व शाल देण्यात आली. यावेळी मानपत्राचे वाचन स्नेहल दामले यांनी केले.