। लोकजागर । फलटण । दि. २८ नोव्हेंबर २०२५ ।
फलटण नगरपरिषद निवडणुकीच्या रिंगणात उतरलेल्या सर्व उमेदवारांसाठी राज्य निवडणूक आयोगाने एक प्रकारे ‘गुड न्यूज’ दिली आहे. दिनांक २ डिसेंबर रोजी मतदान होणार असून, आयोगाच्या आदेशानुसार उमेदवारांना मतदानाच्या अगदी आदल्या दिवसापर्यंत जाहीर प्रचार करण्याची मुभा मिळाली आहे, ज्यामुळे त्यांच्या प्रचाराला आणखी एक दिवस वाढून मिळाला आहे.
राज्य निवडणूक आयोगाचे सचिव सुरेश काकांणी यांच्या स्वाक्षरीने हा महत्त्वपूर्ण आदेश निघाला आहे. त्यानुसार, उमेदवारांना सोमवार, दिनांक १ डिसेंबर रोजी रात्री १० वाजेपर्यंत जाहीर सभा, मिरवणुका किंवा प्रचारफेरीच्या माध्यमातून जोरात प्रचार करता येणार आहे. म्हणजेच, उमेदवारांना शेवटच्या क्षणापर्यंत मतदारांशी संपर्क साधण्यासाठी पूर्ण वेळ मिळणार आहे.
निवडणुकीच्या नियमांनुसार, मतदानाच्या ४८ तास आधी प्रचार थांबतो. मात्र या सुधारित आदेशानुसार सोमवार (१ डिसेंबर) रात्री १० वाजेपर्यंत उमेदवारांना मतदारांना आपल्या बाजूने वळवण्यासाठी पुरेसा वेळ मिळणार आहे.
या संधीचा फायदा घेत सर्व उमेदवारांनी आपले प्रचारतंत्र अधिक तीव्र केले असून, शेवटच्या क्षणापर्यंत जास्तीत जास्त नागरिकांपर्यंत पोहोचण्यासाठी त्यांनी आपले पूर्ण बळ लावले आहे.
