महात्मा फुले यांच्या पणतूसून नीताताई होले यांचे मार्गदर्शन
। लोकजागर । लोणंद । मंगळवार, दि. १० मार्च २०२६ ।
जागतिक महिला दिनाचे औचित्य साधून लोणंद येथे सुजन फाउंडेशन या सेवाभावी संस्थेच्या वतीने आयोजित ‘कर्तबगार महिला सन्मान सोहळा’ अत्यंत आनंदात संपन्न झाला. या कार्यक्रमाच्या अध्यक्षस्थानी महात्मा फुले यांच्या पणतूसून श्रीमती नीताताई होले उपस्थित होत्या. आपल्या अध्यक्षीय भाषणात त्यांनी फुले दांपत्याने स्त्री शिक्षण, समानता आणि बंधुता यासाठी केलेले कार्य आजही समाजासाठी दिशादर्शक असल्याचे प्रतिपादन केले.
मान्यवरांची उपस्थिती आणि मार्गदर्शन: कार्यक्रमास प्रमुख पाहुणे म्हणून डॉ. जयश्री यादव, डॉ. दिपाली क्षीरसागर, खंडाळा पंचायत समिती सदस्या सौ. छायाताई जाधव, सौ. शलाका कणसे-ननावरे आणि लोणंद पोलीस स्टेशनच्या महिला प्रतिनिधी संतोषी होळकर व अमृता चौधरी उपस्थित होत्या. यावेळी अमृता चौधरी यांनी महिला आणि मुलींच्या कायदेशीर हक्क व कर्तव्यांविषयी मौलिक मार्गदर्शन केले, तर डॉ. जयश्री यादव यांनी आरोग्यविषयक माहिती दिली.
विविध क्षेत्रांतील महिलांचा गौरव: कुटुंब सांभाळत समाजात उल्लेखनीय कार्य करणाऱ्या अनेक महिलांना यावेळी सन्मानित करण्यात आले. यामध्ये प्रामुख्याने ज्ञानज्योती सावित्रीबाई फुले पुरस्कार देऊन प्राचार्य शर्मिला नेवसे, विद्या सुनील शिंदे (योग शिक्षिका, फलटण), लीला वाघमारे, अरुणा कुरपड, स्नेहल काळे, नजमा पठाण, संगीता गोरड आणि रजनी शिंदे यांचा गौरव करण्यात आला.
तसेच अंगणवाडी सेविका, मदतनीस आणि विविध क्षेत्रांतील कार्यकर्त्या महिलांनाही ‘कर्तबगार महिला सन्मान’ प्रदान करण्यात आला. यामध्ये उद्योजिका आसावरी नेवसे, ग्रामसेविका इंदुमती धायगुडे, पत्रकार माधुरी भोसले, फोटोग्राफर अनुराधा गारळे यांच्यासह कृषी, शिक्षण आणि सामाजिक क्षेत्रातील अनेक महिलांचा समावेश होता.
सांस्कृतिक व वैचारिक मेजवानी: या कार्यक्रमात स्वरा जाधव हिने सावित्रीबाई फुले यांच्या कार्याचा आढावा घेतला. तसेच कवयित्री अलका बनकर, उज्वला कुंभार आणि अर्चना हिंग्लजकर यांनी स्वरचित कविता सादर करून उपस्थितांना मंत्रमुग्ध केले. कार्यक्रमाचे स्वागत सौ. शितल शेळके-पाटील यांनी केले, तर प्रास्ताविक व सूत्रसंचालन सुजन फाउंडेशनचे अध्यक्ष श्री. अजित जाधव यांनी केले. कार्यक्रम यशस्वी करण्यासाठी स्मिता क्षीरसागर, गीतांजली शिंदे आणि फाउंडेशनच्या सदस्यांनी विशेष परिश्रम घेतले.
