। लोकजागर । फलटण । दि. 26 नोव्हेंबर 2025 ।
केंद्र सरकारने सुरू केलेल्या आयुष्मान भारत प्रधानमंत्री जन आरोग्य योजनेत (AB-PMJAY) आता कुटुंबाला १० लाख रुपयांपर्यंत विमा संरक्षण मिळणार आहे. यापूर्वी हे विमा संरक्षण ५ लाख रुपयांपर्यंत मिळत होते, त्यात वाढ करण्यात आल्याची माहिती कुमारी सिद्धाली शहा यांनी दिली आहे.
प्रभाग क्रमांक ८ च्या भाजपा उमेदवार असलेल्या सिद्धाली शहा सध्या आपल्या निवडणूक प्रचारात घरोघरी जाऊन महिला वर्गासह सर्व मतदारांशी संपर्क साधत आहेत. या दरम्यान त्या केंद्र सरकारच्या महत्त्वाकांक्षी योजनांची माहिती नागरिकांना देत आहेत.
शहा यांनी सांगितले की, या योजनेअंतर्गत मिळणाऱ्या विमा संरक्षणाची मर्यादा ५ लाखांवरून १० लाख रुपये करण्यात आली आहे. विशेष म्हणजे, ७० वर्षांवरील सर्व नागरिकांना या वाढीव योजनेचा लाभ घेता येणार आहे.
या वाढीव विमा संरक्षणाचा लाभ सर्वसामान्य नागरिकांनी घ्यावा, असे आवाहन सिद्धाली शहा यांनी केले आहे. आरोग्य खर्चाचा वाढता ताण कमी करण्यासाठी ही योजना अत्यंत उपयुक्त असून जास्तीत जास्त लोकांनी आपले आयुष्मान कार्ड बनवून या सरकारी सुविधेचा फायदा घ्यावा, असे त्या आपल्या प्रचारादरम्यान मतदारांना सांगत आहेत.
