पुणे-नसरापूर घटनेच्या निषेधार्थ लोकमान्य टिळक पुतळा परिसरात जनक्षोभ; ‘शक्ती’ कायद्याच्या अंमलबजावणीची मागणी.
। लोकजागर । फलटण । ४ मे २०२६ ।
पुणे जिल्ह्यातील नसरापूर येथे एका बालिकेवर झालेल्या अत्यंत दुर्दैवी आणि अमानुष घटनेच्या निषेधार्थ फलटणमध्ये संतापाची लाट उसळली आहे. अखिल भारतीय ब्राह्मण महासंघ नाशिक केंद्र, फलटणच्या वतीने आज शंकर मार्केट येथील लोकमान्य टिळक पुतळा परिसरात एकत्र येऊन या घटनेचा तीव्र निषेध नोंदवण्यात आला. यावेळी उपस्थित नागरिकांनी, “त्या नराधमाला फाशी द्यावी, अन्यथा त्याला आमच्या ताब्यात द्यावे, आम्ही त्याचा योग्य तो बंदोबस्त करू,” असा संतप्त आणि एकमुखी नारा दिला.
‘रांजाच्या पाटला’प्रमाणे शिक्षेची मागणी: यावेळी आपल्या भावना व्यक्त करताना उपस्थितांनी छत्रपती शिवाजी महाराजांच्या इतिहासाचा दाखला दिला. ज्याप्रमाणे महाराजांनी रांजाच्या पाटलाला त्याच्या गुन्ह्यासाठी कठोर शिक्षा दिली होती, तशीच शिक्षा या नराधमाला देऊन समाजात एक कडक संदेश द्यावा, अशी मागणी करण्यात आली. समाजातली संवेदनशीलता संपत चालली असून अशा घटना वारंवार घडणे हे दुर्दैवी असल्याचे मत मान्यवरांनी नोंदवले.
कडक कायद्याची गरज: अशा घटनांना पायबंद घालण्यासाठी आणि आरोपींना तातडीने कठोर शिक्षा होण्यासाठी सरकारने ‘शक्ती’ कायद्याची तातडीने अंमलबजावणी करावी, अशी मागणीही यावेळी करण्यात आली. सरकारने या प्रकरणात हस्तक्षेप करून आरोपीला लवकरात लवकर फाशीच्या खांबावर चढवावे, हीच संपूर्ण फलटणकरांची भावना असल्याचे यावेळी सांगण्यात आले.
मान्यवरांची उपस्थिती: या निषेध सभेला फलटण शहरातील विविध क्षेत्रांतील मान्यवर, व्यापारी बांधव, विविध सार्वजनिक मंडळांचे पदाधिकारी आणि नागरिक मोठ्या संख्येने उपस्थित होते. सर्वांनी काळ्या फिती लावून आणि घोषणाबाजी करून या घटनेचा निषेध केला.
