बँकेच्या तांत्रिक अडचणींमुळे ४५ लाभार्थी निधीच्या प्रतीक्षेत; प्रशासनाकडून उडवाउडवीची उत्तरे मिळत असल्याचा आरोप.
। लोकजागर । फलटण । ९ जून २०२६ ।
फलटण नगरपरिषदेकडून देण्यात येणारा सन २०२५-२६ या आर्थिक वर्षातील ५ टक्के दिव्यांग कल्याण निधी अद्याप अनेक गरजू लाभार्थ्यांना मिळालेला नाही. प्रशासकीय उदासीनता आणि तांत्रिक दिरंगाईमुळे हक्काच्या निधीपासून वंचित राहिलेल्या दिव्यांग बांधवांचा संयम आता सुटला असून, येत्या १० जूनपर्यंत हा प्रलंबित निधी संबंधित लाभार्थ्यांच्या बँक खात्यात जमा न केल्यास फलटण नगरपरिषदेसमोर तीव्र ठिय्या आंदोलन छेडण्यात येईल, असा इशारा दिव्यांग बांधवांनी एका अधिकृत निवेदनाद्वारे मुख्याधिकारी व प्रशासनाला दिला आहे.
मिळालेल्या माहितीनुसार, फलटण नगरपरिषदेच्या वतीने गेल्या एप्रिल महिन्यामध्ये शहरातील काही दिव्यांग बांधवांना या कल्याणकारी निधीचे टप्प्याटप्प्याने वाटप करण्यात आले आहे. मात्र, सातारा जिल्हा मध्यवर्ती सहकारी बँक लिमिटेड (SDCC), शाखा फलटण येथे खाते असलेल्या एकूण ४५ लाभार्थ्यांच्या खात्यात अद्याप हा हक्काचा निधी जमा झालेला नाही. दोन महिने उलटून गेले तरी खात्यावर पैसे आले नसल्याने आणि या प्रलंबित निधीबाबत संतप्त लाभार्थ्यांनी नगरपरिषदेतील संबंधित विभागाच्या कर्मचाऱ्यांकडे वारंवार चकरा मारून विचारणा केली. मात्र, नगरपरिषद प्रशासनाकडून व संबंधित कर्मचाऱ्यांकडून केवळ उडवाउडवीची आणि असमाधानकारक उत्तरे दिली जात असल्याचा थेट आरोप दिव्यांगांनी दिलेल्या निवेदनात केला आहे.
१० जूनची अंतिम डेडलाईन; निवेदनाद्वारे प्रशासनाला इशारा: बँकेच्या स्तरावर किंवा प्रशासकीय प्रक्रियेत अडकलेला हा ५ टक्के दिव्यांग निधी त्वरित आणि विनाविलंब पात्र लाभार्थ्यांच्या खात्यात जमा करावा, अशी मागणी आता जोर धरू लागली आहे. १० जूनपर्यंत जर हा निधी बँक खात्यात वर्ग झाला नाही, तर दिव्यांग बांधवांच्या प्रश्नांवर कोणताही तडजोड न करता फलटण नगरपरिषद कार्यालयाच्या मुख्य प्रवेशद्वारासमोर प्रशासनाचा निषेध करण्यासाठी तीव्र आंदोलन करण्यात येईल, असा स्पष्ट इशारा देण्यात आला आहे. याबाबतचे सविस्तर मागणीचे निवेदन फलटण नगरपरिषदेचे नगराध्यक्ष आणि मुख्याधिकारी यांना सादर करण्यात आले असून, आता प्रशासन यावर काय पावले उचलणार, याकडे सर्वांचे लक्ष लागले आहे.
