वसुलीकामी पालिकेला सहकार्य करा : मुख्याधिकारी निखील मोरे यांचे आवाहन
। लोकजागर । फलटण । दि. १३ मार्च २०२५ ।
सन २०२४ – २०२५ या आर्थिक वर्षअखेरीच्या पार्श्‍वभूमीवर फलटण नगरपालिकेकडून शहरातील थकबाकीदार मिळकत धारकांविरोधात कारवाई सुरु करण्यात आली असून या वसुलीकामी फलटणकरांनी नगरसालिकेला सहकार्य करावे, असे आवाहन मुख्याधिकारी निखील मोरे यांनी केले आहे.
याबाबत दिलेल्या प्रसिद्धीपत्रकात मुख्याधिकारी निखील मोरे यांनी नमूद केले आहे की, फलटण नगर परिषदेमार्फत नगरपालिका हद्दीतील घरपट्टी व पाणीपट्टी वसुलीची मोहिम हाती घेणेत आलेली असून त्यामध्ये थकबाकीदारांचे नळ कनेक्शन नगरपालिकेच्या वसुली पथकाकडून बंद करणेत येत आहे. नगर परिषदेकडून ही कटू कारवाई टाळणेसाठी थकबाकीदार मिळकतधारकांनी त्यांचेकडे असणारी येणे बाकीची रक्कम नगर परिषदेकडे भरणा करुन नगरपालिकेला वसुलीकामी सहकार्य करावे.
सध्या सन २०२४ – २०२५ ची वर्षअखेर सुरु असून काही मिळकतदारांनी अद्यापही मिळकतकराची रक्कम भरलेली नाही. त्यामुळे नगरपालिकेमार्फत कराची रक्कम वसुलीकामी पालिका कर्मचारी यांची 11 वसुली पथके विभागनिहाय तयार केलेली आहे. सदर पथके नागरीकांच्या घरोघरी जावून मिळकत कर भरणा करणेकामी नागरीकांना आवाहन करुन वसुली करीत आहेत. नगर परिषदेमार्फत थकबाकीदारांचे नळ कनेक्शन बंद करणेची कारवाई सुरु आहे. तसेच नगरपरिषदेचे मालकीचे शॉपिंग सेंटरमधील थकबाकीदार गाळेधारक यांचे ताब्यातील दुकानगाळे सिल करुन नगर परिषदेमार्फत ताब्यात घेणेची कार्यवाही सुरु करणेत आलेली आहे, असेही मुख्याधिकारी निखील मोरे यांनी निदर्शनास आणून दिले आहे.
तरी थकीत मालमत्ता कर व पाणीपट्टीची तसेच गाळाभाडेची रक्कम त्वरीत भरणा करावी व जप्ती करणे, नळ कनेक्शन बंद करणे, गाळा सिल करणे या कटू बाबी टाळून नगर परिषदेस वसुलीकामी सहकार्य करावे, असे आवाहन नगरपालिकेमार्फत थकबाकीदारांना करण्यात आले आहे.
