शासकीय योजनांचा लाभ थेट जनतेच्या दारात; नागरिकांनी प्रलंबित कामे पूर्ण करून घेण्याचे आमदार सचिन पाटील यांचे आवाहन.
। लोकजागर । वाठार स्टेशन । २५ एप्रिल २०२६ ।
नागरिकांच्या तक्रारींचे निवारण करण्यासाठी आणि विविध शासकीय योजनांचा लाभ एकाच छताखाली मिळवून देण्यासाठी राज्य शासनाच्या वतीने ‘छत्रपती शिवाजी महाराज महाराजस्व समाधान शिबिर’ अभियान राबविण्यात येत आहे. या अभियानाच्या पहिल्या टप्प्याचा शुभारंभ वाठार स्टेशन मंडल येथे आमदार सचिन पाटील यांच्या प्रमुख उपस्थितीत करण्यात आला. या शिबिराच्या माध्यमातून प्रशासकीय यंत्रणा थेट जनतेच्या दारात पोहोचली असून, नागरिकांनी आपली प्रलंबित कामे तातडीने पूर्ण करून घ्यावीत, असे आवाहन आमदार पाटील यांनी यावेळी केले.
थेट लाभ आणि दाखल्यांचे वाटप: या अभियानांतर्गत विविध शासकीय विभागांचे स्टॉल्स लावण्यात आले होते. यामध्ये लाभार्थ्यांना प्रत्यक्ष लाभ देण्यात आला, तसेच जातीचे दाखले, उत्पन्नाचे दाखले, सातबारा उतारा आणि इतर आवश्यक कागदपत्रांचे जागीच वाटप करण्यात आले. शासनाच्या लोककल्याणकारी योजनांची माहिती देऊन पात्र नागरिकांचे अर्ज भरून घेण्याची प्रक्रियाही यावेळी पार पडली. यामुळे नागरिकांचा वेळ आणि हेलपाटे वाचल्याने परिसरातून समाधान व्यक्त होत आहे.
मान्यवरांची उपस्थिती: यावेळी सातारा जिल्हा परिषदेच्या अध्यक्षा डॉ. प्रियाताई शिंदे, जिल्हा परिषद सदस्य अमित चव्हाण आणि पंचायत समिती सदस्या सौ. वनिताताई भोईटे यांची विशेष उपस्थिती होती. प्रशासकीय स्तरावरून कोरेगावचे उपविभागीय अधिकारी (प्रांत) प्रमोद कुदळे, तहसीलदार संगमेश कोडे, गटविकास अधिकारी सुप्रिया चव्हाण, पोलीस उपनिरीक्षक सुशील भोसले, नायब तहसीलदार संदीप चव्हाण तसेच सरपंच सीमाताई चव्हाण यांनी उपस्थितांना मार्गदर्शन केले.
वाठार स्टेशन आणि परिसरातील बहुसंख्य नागरिकांनी या शिबिरात सहभागी होऊन विविध योजनांचा लाभ घेतला. “प्रशासकीय कामात पारदर्शकता आणण्यासाठी आणि सामान्य माणसाला केंद्रबिंदू मानून हे अभियान राबवले जात आहे,” असे मत मान्यवरांनी यावेळी व्यक्त केले. शासकीय विभागाच्या सर्व प्रमुख अधिकाऱ्यांनी या अभियानासाठी विशेष परिश्रम घेतले.
